Luke 23

א וַיָּקָם כָּל־קְהָלָם וַיּוֹלִיכֻהוּ אֶל־פִּילָטוֹס׃

ב וַיָּחֵלּוּ לְדַבֵּר עָלָיו שִׂטְנָה לֵאמׂר אֶת־זֶה מָצָאנוּ מֵסִית אֶת־הָעָם וּמׂנֵעַ אוֹתוֹ מִתֵּת מַס לְקֵיסַר בְּאָמְרוֹ כִּי הוּא מֶלֶךְ הַמָּשִׁיחַ׃

ג וַיִּשְׁאָלֵהוּ פִילָטוֹס לֵאמׂר הַאַתָּה מֶלֶךְ הַיְּהוּדִים וַיַּעַן וַיּׂאמֶר אַתָּה אָמָרְתָּ׃

ד וַיּׂאמֶר פִּילָטוֹס אֶל־רָאשֵׁי הַכּׂהֲנִים וְאֶל־הֲמוֹן הָעָם לׂא־מָצָאתִי אַשְׁמָה בָּאִישׁ הַזֶּה׃

ה וְהֵם הִתְאַמְּצוּ לְדַבֵּר מַדִּיחַ הוּא אֶת־הָעָם בְּלַמְּדוֹ בְּכָל־יְהוּדָה הָחֵל מִן־הַגָּלִיל וְעַד־הֵנָּה׃

ו וַיְהִי כִּשְׁמׂעַ פִּילָטוֹס אֶת־שֵׁם הַגָּלִיל וַיִּשְׁאַל אִם־הוּא אִישׁ גְּלִילִי׃

ז וְכַאֲשֶׁר יָדַע כִּי־מִמֶּמְשֶׁלֶת הוֹרְדוֹס הוּא שְׁלָחוֹ אֶל־הוֹרְדוֹס אֲשֶׁר הָיָה גַם־הוּא בִּירוּשָׁלַיִם בַּיָּמִים הָאֵלֶּה׃

ח וַיִּשְׂמַח הוֹרְדוֹס עַד־מְאׂד כִּרְאוֹתוֹ אֶת־יֵשׁוּעַ כִּי מִיָּמִים רַבִּים הִתְאַוָּה לִרְאׂת אׂתוֹ כִּי־שָׁמַע אֶת־שָׁמְעוֹ וַיְקַו לִרְאׂת אוֹת אֲשֶׁר יַעֲשֶׂה׃

ט וַיֶּרֶב לִשְׁאׂל אוֹתוֹ וְהוּא לׂא־הֵשִׁיב אׂתוֹ דָּבָר׃

י וַיַּעַמְדוּ רָאשֵׁי הַכּׂהֲנִים וְהַסּוֹפְרִים וַיִּתְחַזְּקוּ לְדַבֵּר עָלָיו שִׂטְנָה׃

יא וַיִּבֶז אׂתוֹ הוֹרְדוֹס הוּא וְצִבְאוֹתָיו וַיְהָתֶל־בּוֹ וַיַּלְבֵּשׁ אוֹתוֹ בֶּגֶד זְהוֹרִית וַיִּשְׁלָחֵהוּ אֶל־פִּילָטוֹס׃

יב בַּיּוֹם הַהוּא נַעֲשׂוֹוֹ פִּילָטוֹס וְהוֹרְדוֹס אׂהֲבִים זֶה לָזֶה כִּי לְפָנִים אֵיבָה בֵינֵיהֶם׃

יג וַיִּקְרָא פִילָטוֹס אֶת־רָאשֵׁי הַכּׂהֲנִים וְאֶת־הַשָּׂרִים וְאֶת־הָעָם׃

יד וַיּׂאמֶר אֲלֵיהֶם הֲבֵאתֶם לְפָנַי אֶת־הָאִישׁ הַזֶּה כְּמֵסִית אֶת־הָעָם וְהִנֵּה אָנׂכִי חֲקַרְתִּיו לְעֵינֵיכֶם וְלׂא מָצָאתִי בָּאִישׁ הַזֶּה כָּל־אַשְׁמָה מִן־הַדְּבָרִים אֲשֶׁר אַתֶּם טוֹעֲנִים אׂתוֹ׃

טו וְגַם־הוֹרְדוֹס לׂא מָצָא כִּי הֱשִׁיבוֹ אֵלֵינוּ וְהִנֵּה אֵין־חֵטְא מָוֶת לָאִישׁ הַזֶּה׃

טז עַל־כֵּן אֲיַסְּרֶנּוּ וְאַתִּירֶנּוּ׃

יז וְלוֹ הָיָה לְהַתִּיר לָהֶם חָבוּשׁ אֶחָד בִּימֵי הֶחָג׃

יח וַיִּצְעֲקוּ כָל־הֲמוֹנָם וַיּׂאמְרוּ הָסֵר אֶת־זֶה וְהַתֵּר לָנוּ אֵת בַּר־אַבָּא׃

יט וְהוּא הָיָה אָסוּר בֵּית הַכֶּלֶא עַל־דְּבַר מֶרֶד אֲשֶׁר־נִהְיָה בָעִיר וְעַל־רָצַח׃

כ וַיּׂסֶף פִּילָטוֹס וַיְדַבֵּר אֲלֵיהֶם כִּי חָפֵץ לְהַתִּיר אֶת־יֵשׁוּעַ׃

כא וְהֵמָּה קָרְאוּ לֵאמׂר הַצְלֵב אוֹתוֹ הַצְלֵב׃

כב וַיּׂאמֶר אֲלֵיהֶם פַּעַם שְׁלִישִׁית מֶה עָשָׂה זֶה רָעָה כָּל־מִשְׁפַּט מָוֶת לׂא־מָצָאתִי בוֹ עַל־כֵּן אֲיַסְּרֶנּוּ וְאַתִּירֶנּוּ׃

כג וַיִּפְצְרוּ בוֹ בְּקוֹל גָּדוֹל וַיְבַקְשׁוּ אֲשֶׁר יִצָּלֵב וַיֶּחֱזַק קוֹלָם וְקוֹל רָאשֵׁי הַכּׂהֲנִים׃

כד וַיִּגְזׂר פִּילָטוֹס אֲשֶׁר תֵּעָשֶׂה בַּקָּשָׁתָם׃

כה וַיַּתֵּר לָהֶם אֶת־הַנָּתוּן בְּבֵית הָאֲסוּרִים עַל־דְּבָר־מֶרֶד וָרֶצַח אֵת אֲשֶׁר שָׁאָלוּ וְאֶת־יֵשׁוּעַ נָתַן לָהֶם לַעֲשׂוֹת בּוֹ כִּרְצוֹנָם׃

כו וְכַאֲשֶׁר הוֹלִיכֻהוּ מִשָּׁם וַיַּחֲזִיקוּ בְּאִישׁ אֶחָד הַבָּא מִן־הַשָּׂדֶה וּשְׁמוֹ שִׁמְעוֹן אִישׁ קוּרִינִי וַיָּשִׂימוּ עָלָיו אֶת־הַצְּלוּב לָשֵׂאת אַחֲרֵי יֵשׁוּעַ׃

כז וַיֵּלְכוּ אַחֲרָיו הֲמוֹן עַם־רָב וַהֲמוֹן נָשִׁים וְהֵנָּה סׂפְדוֹת וּמְקוֹנֲנוֹת עָלָיו׃

כח וַיִּפֶן יֵשׁוּעַ וַיּׂאמֶר אֲלֵיהֶן בְּנוֹת יְרוּשָׁלַיִם אַל־תִּבְכֶּינָה עָלַי כִּי־עַל־נַפְשְׁכֶן בְּכֶינָה וְעַל־בְּנֵיכֶן׃

כט כִּי הִנֵּה יָמִים בָּאִים וְאָמְרוּ אַשְׁרֵי הָעֲקָרוֹת וְאַשְׁרֵי הַמֵּעַיִם אֲשֶׁר לׂא יָלָדוּ וְאַשְׁרֵי הַשָּׁדַיִם אֲשֶׁר לׂא הֵינִיקוּ׃

ל אָז יׂאמְרוּ אֶל־הֶהָרִים נִפְלוּ עָלֵינוּ וְאֶל־הַגְּבָעוֹת כַּסּוּנוּ׃

לא כִּי אִם־כָּכָה יַעֲשׂוֹוֹ בָּעֵץ הַלָּח מַה־יֵּעָשֶׂה בַּיָּבֵשׁ׃

לב וְגַם־שְׁנַיִם אֲחֵרִים אַנְשֵׁי רֶשַׁע מוּצָאִים לַמָּוֶת אִתּוֹ׃

לג וַיְהִי כַּאֲשֶׁר בָּאוּ אֶל־הַמָּקוֹם הַנִּקְרָא גֻּלְגָּלְתָּא וַיִּצְלְבוּ אׂתוֹ שָׁם וְאֶת־אַנְשֵׁי הָרֶשַׁע אֶחָד מִימִינוֹ וְאֶחָד מִשְּׂמׂאלוֹ׃

לד וַיּׂאמֶר יֵשׁוּעַ אָבִי סְלַח לָהֶם כִּי אֵינָם יׂדְעִים מָה הֵם עׂשִׂים וַיְחַלְּקוּ בְגָדָיו לָהֶם וַיַּפִּילוּ גוֹרָל׃

לה וְהָעָם עׂמֵד וְרׂאֶה וַיַּלְעִיגוּ־לוֹ הַשָּׂרִים לֵאמׂר אֶת־אֲחֵרִים הוֹשִׁיעַ יוֹשַׁע־נָא נַפְשׁוֹ אִם־הוּא הַמָּשִׁיחַ בְּחִיר הָאֱלׂהִים׃

לו וַיְהָתֵלּוּ בוֹ אַנְשֵׁי הַצָּבָא וַיִּגְּשׁוּ וַיָּבִיאוּ לוֹ חׂמֶץ׃

לז וַיּׂאמְרוּ אִם־אַתָּה הוּא מֶלֶךְ הַיְּהוּדִים הושַׁע נַפְשֶׁךָ׃

לח וְגַם־מִכְתָּב הָיָה מִמַּעַל לוֹ בִּכְתָב יְוָנִי וְרוֹמִי וְעִבְרִי זֶה הוּא מֶלֶךְ הַיְּהוּדִים׃

לט וְאֶחָד מֵאַנְשֵׁי הָרֶשַׁע הַתְּלוּיִם גִּדֵּף אׂתוֹ לֵאמׂר הֲלׂא אַתָּה הַמָּשִׁיחַ הוֹשַׁע עַצְמְךָ וְאׂתָנוּ׃

מ וַיַּעַן הָאַחֵר וַיִּגְעַר־בּוֹ לֵאמׂר הֲלׂא תִירָא אֶת־הָאֱלׂהִים כִּי עָנְשׁוֹ עָנְשֶׁךָ׃

מא וְהִנֵּה אֲנַחְנוּ כַּמִּשְׁפָּט כִּי לָקַחְנוּ כִּגְמוּל יָדֵינוּ וְהָאִישׁ הַזֶּה לׂא־עָשָׂה מְאוּמָה רָע׃

מב וַיּׂאמֶר אֶל־יֵשׁוּעַ זָכְרֵנִי־נָא אֲדׂנִי בְּבֹאֲךָ בְּמַלְכוּתֶךָ׃

מג וַיּׂאמֶר יֵשׁוּעַ אֵלָיו אָמֵן אׂמֵר אֲנִי לְךָ כִּי הַיּוֹם תִּהְיֶה עִמָּדִי בְּגַן־עֵדֶן׃

מד וַיְהִי כַּשָּׁעָה הַשִּׁשִּׁית וְהִנֵּה־חשֶׁךְ עַל־כָּל־הָאָרֶץ עַד הַשָּׁעָה הַתְּשִׁיעִית׃

מה וַיֶּחְשַׁךְ הַשָּׁמֶשׁ וּפָרׂכֶת הַהֵיכָל נִקְרְעָה לִשְׁנַיִם קְרָעִים׃

מו וַיִּקְרָא יֵשׁוּעַ בְּקוֹל גָּדוֹל וַיּׂאמֶר אָבִי בְּיָדְךָ אַפְקִיד רוּחִי וַיְהִי כְּכַלּוֹתוֹ לְדַבֵּר וַיִּפַּח נַפְשׁוֹ׃

מז וַיַּרְא שַׂר־הַמֵּאָה אֵת אֲשֶׁר נִהְיָתָה וַיִּתֵּן כָּבוֹד לֵאלׂהִים וַיּׂאמַר אָכֵן הָאִישׁ הַזֶּה צַדִּיק הָיָה׃

מח וְכָל־הֲמוֹן הָעָם אֲשֶׁר הִתְאַסְּפוּ לִרְאוֹת הַמַּרְאֶה הַזֶּה בְּהַבִּיטָם אֶל־כָּל־אֲשֶׁר נַעֲשָׂה תּוֹפֲפוּ עַל־לִבָּם וַיָּשׁוּבוּ׃

מט וְכָל־מְיֻדָּעָיו עָמְדוּ מֵרָחוֹק וְגַם־הַנָּשִׁים אֲשֶׁר הָלְכוּ אִתּוֹ מִן־הַגָּלִיל וְעֵינֵיהֶן רׂאוֹת אֶת־אֵלֶּה׃

נ וְהִנֵּה־אִישׁ וּשְׁמוֹ יוֹסֵף וְהוּא מִן־הַיּׂעֲצִים אִישׁ טוֹב וְצַדִּיק מִן־הָרָמָתַיִם עִיר הַיְּהוּדִים׃

נא אֲשֶׁר לׂא־נָטָה אַחֲרֵי עֲצָתָם וּפָעֳלָם וְהוּא מְחַכֶּה לְמַלְכוּת הָאֱלׂהִים׃

נב וַיִּגַּשׁ אֶל־פִּילָטוֹס וַיִּשְׁאַל מִמֶּנּוּ אֵת גְּוִיַּת יֵשׁוּעַ׃

נג וַיּוֹרֶד אׂתָהּ וַיִּכְרְכֶהָ בִסְדִינִים וַיְשִׂימֶהָ בְקֶבֶר חָצוּב בַּסָּלַע אֲשֶׁר עֲדֶן לׂא הוּשַׂם־בּוֹ אָדָם׃

נד וְהַיּוֹם עֶרֶב שַׁבָּת וְהַשַּׁבָּת הִגִּיעָה׃

נה וּמִן־הַנָּשִׁים אֲשֶׁר בָּאוּ אִתּוֹ מִן־הַגָּלִיל הׂלְכוֹת אַחֲרָיו וַתִּרְאֶינָה אֶת־הַקֶּבֶר וְאֶת אֲשֶׁר הוּשַׂם־בּוֹ גְּוִיָּתוֹ׃

נו וַתָּשׁׂבְנָה וַיָּכִינוּ סַמִּים וּמִרְקָחוֹת וּבַשַּׁבָּת שָׁבְתוּ כַמִּצְוָה׃