Luke 1

א אַחֲרֵי אֲשֶׁר רַבִּים הוֹאִילוּ לְחַבֵּר סִפּוּר הַמַּעֲשִׂים אֲשֶׁר נֶאֶמְנוּ בִשְׁלֵמוּת בְּתוֹכֵנוּ׃

ב כַּאֲשֶׁר מְסָרוּם לָנוּ הָרׂאִים אׂתָם בְּעֵינֵיהֶם מִתְּחִלָּה וַאֲשֶׁר הָיוּ מְשָׁרֲתֵי הַדָּבָר׃

ג חָשַׁבְתִּי לְטוֹב גַּם־אֲנִי הַחׂקֵר אַחַר כָּל־הַדְּבָרִים הֵיטֵב מֵרֵאשִׁיתָם לְכָתְבָם כְּסִדְרָם אֵלֶיךָ הָאַדִּיר תְּאוֹפִילוֹס׃

ד לְמַעַן תֵּדַע אֱמֶת הָאֲמָרִים אֲשֶׁר לֻמָּדְתָּ׃

ה כּׂהֵן הָיָה בִּימֵי הוֹרְדוֹס מֶלֶךְ אֶרֶץ יְהוּדָה זְכַרְיָה שְׁמוֹ מִמִּשְׁמֶרֶת אֲבִיָּה וְלוֹ אִשָּׁה מִבְּנוֹת אַהֲרׂן וּשְׁמָהּ אֱלִישָׁבַע׃

ו וּשְׁנֵיהֶם צַדִּיקִים לִפְנֵי הָאֱלׂהִים וְהׂלְכֵי תׂם בְּכָל־מִצְוֹת יְהוָֹה וּבְחֻקּׂתָיו׃

ז וְלָהֶם אֵין וָלָד כִּי אֱלִישֶׁבַע עֲקָרָה וּשְׁנֵיהֶם בָּאוּ בַיָּמִים׃

ח וַיְהִי הַיּוֹם בְּכַהֲנוֹ לִפְנֵי אֱלׂהִים בְּסֵדֶר מִשְׁמָרוֹ׃

ט לְהַקְטִיר קְטׂרֶת לְפִי גוֹרָלוֹ כְּמִשְׁפַּט עֲבוֹדַת הַכּׂהֲנִים וַיָּבֹא אֶל־הֵיכַל יְהוָֹה׃

י וְכָל־קְהַל הָעָם מִתְפַּלֲּלִים בַּחוּץ בְּשַׁעַת הַקְּטׂרֶת׃

יא וְהִנֵּה מַלְאַךְ יְהוָֹה נִרְאָה אֵלָיו עׂמֵד מִימִין מִזְבַּח הַקְּטׂרֶת׃

יב וַיַּרְא זְכַרְיָה וַיִּבָּהֵל וְאֵימָה נָפְלָה עָלָיו׃

יג וַיּׂאמֶר אֵלָיו הַמַּלְאָךְ אַל־תִּירָא זְכַרְיָהוּ כִּי נִשְׁמְעָה תְּפִלָּתֶךָ וֶאֱלִישֶׁבַע אִשְׁתְּךָ תֵּלֵד לְךָ בֵּן וְקָרָאתָ שְׁמוֹ יוֹחָנָן׃

יד וְהָיָה־לְךָ לְשִׂמְחָה וָגִיל וְרַבִּים יִשְׂמְחוּ בְּהִוָּלְדוֹ׃

טו כִּי־גָדוֹל יִהְיֶה לִפְנֵי יְהוָֹה וְיַיִן וְשֵׁכָר לׂא יִשְׁתֶּה וְרוּחַ הַקּׂדֶשׁ יִמָּלֵא מִבֶּטֶן אִמּוֹ׃

טז וְרַבִּים מִבְּנֵי יִשְׂרָאֵל יָשִׁיב אֶל־יְהוָֹה אֱלׂהֵיהֶם׃

יז וְהוּא יֵלֵךְ לְפָנָיו בְּרוּחַ אֵלִיָּהוּ וּבִגְבוּרָתוֹ לְהָשִׁיב לֵב אָבוֹת עַל־בָּנִים וְאֵת הַסּוֹרֲרִים בִּתְבוּנַת הַצַּדִּיקִים לְהַעֲמִיד עַם מוּכָן לַיהוָֹה׃

יח וַיּׂאמֶר זְכַרְיָה אֶל־הַמַּלְאָךְ בַּמָּה אֵדַע אֶת־הַדָּבָר הַזֶּה כִּי־אֲנִי זָקַנְתִּי וְאִשְׁתִּי בָּאָה בַיָּמִים׃

יט וַיַּעַן הַמַּלְאָךְ וַיּׂאמֶר אֵלָיו אֲנִי גַבְרִיאֵל הָעוֹמֵד לִפְנֵי הָאֱלׂהִים וְשָׁלוּחַ אָנׂכִי לְדַבֵּר אֵלֶיךָ וּלְבַשֶּׂרְךָ אֶת־הַבְּשׂוֹרָה הַזּׂאת׃

כ וְהִנְּךָ נֶאֱלָם וְלׂא תוּכַל לְדַבֵּר עַד־הַיּוֹם אֲשֶׁר יָקוּם הַדָּבָר הַזֶּה תַּחַת כִּי־לׂא הֶאֱמַנְתָּ לִדְבָרַי וְהֵם יִמָּלְאוּ בְּמוֹעֲדָם׃

כא וְהָעָם הוֹחִילוּ לִזְכַרְיָה וַיִּתְמְהוּ כִּי־הִתְמַהְמַהּ בַּהֵיכָל׃

כב וַיְהִי בְצֵאתוֹ לׂא יָכׂל לְדַבֵּר אֲלֵיהֶם וַיֵּדְעוּ כִּי־מַרְאָה רָאָה בַּהֵיכָל וַיִּרְמׂז לָהֶם וְעוֹדֶנּוּ נֶאֱלָם׃

כג וַיְהִי כַּאֲשֶׁר מָלְאוּ יְמֵי עֲבֹדָתוֹ וַיָּשָׁב אֶל־בֵּיתוֹ׃

כד וַיְהִי אַחַר הַיָּמִים הָאֵלֶּה וַתַּהַר אֱלִישֶׁבַע אִשְׁתּוֹ וַתִּתְחַבֵּא חֲמִשָּׁה חֳדָשִׁים וַתּׂאמַר׃

כה כָּכָה עָשָׂה לִי יְהוָֹה בִּימֵי פָקְדוֹ אוֹתִי לֶאֱסׂף אֶת־חֶרְפָּתִי מִבְּנֵי אָדָם׃

כו וַיְהִי בַּחׂדֶשׁ הַשִּׁשִּׁי וַיִּשְׁלַח אֱלׂהִים אֶת־גַּבְרִיאֵל הַמַּלְאָךְ גָּלִילָה אֶל־עִיר אַחַת וּשְׁמָהּ נְצָרֶת׃

כז אֶל־בְּתוּלָה מְאׂרָשָׂה לְאִישׁ אֲשֶׁר־שְׁמוֹ יוֹסֵף מִבֵּית דָּוִד וְשֵׁם הַבְּתוּלָה מִרְיָם׃

כח וַיָּבֹא הַמַּלְאָךְ הַחַדְרָה וַיּׂאמֶר אֵלֶיהָ שָׁלוֹם לָךְ אֵשֶׁת־חֵן יְהוָֹה עִמָּךְ (בְּרוּכָה אַתְּ בַּנָּשִׁים)׃

כט וְהִיא (בִּרְאוֹתָהּ) נִבְהֲלָה לִדְבָרוֹ וַתּׂאמֶר בְּלִבָּהּ מָה הַבְּרָכָה הַזּׂאת׃

ל וַיּׂאמֶר לָהּ הַמַּלְאָךְ אַל־תִּירְאִי מִרְיָם כִּי־מָצָאתְ חֵן לִפְנֵי הָאֱלׂהִים׃

לא וְהִנָּךְ הָרָה וְיׂלַדְתְּ בֵּן וְקָרָאתְ אֶת־שְׁמוֹ יֵשׁוּעַ׃

לב וְהוּא גָּדוֹל יִהְיֶה וּבֶן־עֶלְיוֹן יִקָּרֵא וַיהוָֹה אֱלׂהִים יִתֶּן־לוֹ אֶת־כִּסֵּא דָּוִד אָבִיו׃

לג וּמָלַךְ עַל־בֵּית יַעֲקׂב לְעוֹלָם וָעֶד וּלְמַלְכוּתוֹ אֵין קֵץ׃

לד וַתּׂאמֶר מִרְיָם אֶל־הַמַּלְאָךְ אֵיךְ יִהְיֶה הַדָּבָר הַזֶּה וַאֲנִי אֵינֶנִּי יׂדַעַת אִישׁ׃

לה וַיַּעַן הַמַּלְאָךְ וַיּׂאמֶר אֵלֶיהָ רוּחַ הַקּׂדֶשׁ תָּבוֹא עָלַיךְ וּגְבוּרַת עֶלְיוֹן תָּצֵל עָלָיּךְ עַל־כֵּן קָדוֹשׁ יֵאָמֵר לַיִּלוֹד בֶּן־הָאֱלׂהִים׃

לו וְהִנֵּה אֱלִישֶׁבַע קְרוֹבָתֵךְ אֲשֶׁר קָרְאוּ־לָהּ עֲקָרָה גַּם־הִיא הָרָה לָלֶדֶת בֵּן בְּזִקְנָתָהּ וְזֶה לָּהּ הַחׂדֶשׁ הַשִּׁשִּׁי׃

לז כִּי לׂא־יִפָּלֵא מֵאֱלׂהִים כָּל־דָּבָר׃

לח וַתּׂאמֶר מִרְיָם הִנְנִי שִׁפְחַת יְהוָֹה יְהִי־לִי כִּדְבָרֶךָ וַיֵּצֵא מֵאִתָּהּ הַמַּלְאָךְ׃

לט וַתָּקָם מִרְיָם בַּיָּמִים הָהֵם וַתְּמַהֵר לָלֶכֶת הָהָרָה אֶל־עִיר יְהוּדָה׃

מ וַתָּבֹא בֵּית זְכַרְיָה וַתְּבָרֶךְ אֶת־אֱלִישָׁבַע׃

מא וַיְהִי כִּשְׁמׂעַ אֱלִישֶׁבַע אֶת־בִּרְכַּת מִרְיָם וַיִּרְקַד הַיֶּלֶד בְּמֵעֶיהָ וַתִּמָּלֵא אֱלִישֶׁבַע רוּחַ הַקּׂדֶשׁ׃

מב וַתִּקְרָא בְּקוֹל גָּדוֹל וַתּׂאמַר בְּרוּכָה אַתְּ בַּנָּשִׁים וּבָרוּךְ פְּרִי בִטְנֵךְ׃

מג וּמַה־לִּי כִּי־אֵם אֲדׂנִי בָּאָה אֵלָי׃

מד כִּי קוֹל בִּרְכָתֵךְ בָּא בְאָזְנָי וְהִנֵּה רָקַד בְּשִׂמְחָה הַיֶּלֶד בְּמֵעָי׃

מה וְאַשְׁרֵי הַמַּאֲמִינָה כִּי הִמָּלֵא יִמָּלֵא אֲשֶׁר דֻּבַּר־לָהּ מֵאֵת יְהוָֹה׃

מו וַתּׂאמֶר מִרְיָם רוֹמֲמָה נַפְשִׁי אֶת־יְהוָֹה׃

מז וַתָּגֶל רוּחִי בֵּאלׂהֵי יִשְׁעִי׃

מח אֲשֶׁר רָאָה בָּעֳנִי אֲמָתוֹ כִּי הִנֵּה מֵעַתָּה יְאַשְּׁרוּנִי כָּל־הַדּׂרוֹת׃

מט כִּי גְדׂלוֹת עָשָׂה לִי שַׁדָּי וְקָדוֹשׁ שְׁמוֹ׃

נ וְחַסְדּוֹ לְדוֹר דּוֹרִים עַל יְרֵאָיו׃

נא גְּבוּרוֹת עָשָׂה בִּזְרׂעוֹ פִּזַּר גֵּאִים בִּמְזִמּוֹת לִבָּם׃

נב הָרַס נְדִיבִים מִכִּסְאוֹתָם וַיָּרֶם שְׁפָלִים׃

נג רְעֵבִים מִלֵּא־טוֹב וַעֲשִׁירִים שִׁלַּח רֵיקָם׃

נד תָּמַךְ בְּיִשְׂרָאֵל עַבְדּוֹ לִזְכּׂר אֶת־רַחֲמָיו׃

נה כַּאֲשֶׁר דִּבֶּר אֶל־אֲבוֹתֵינוּ לְאַבְרָהָם וּלְזַרְעוֹ עַד־עוֹלָם׃

נו וַתֵּשֶׁב מִרְיָם עִמָּהּ כִּשְׁלשָׁה חֳדָשִׁים וַתָּשָׁב לְבֵיתָהּ׃

נז וַיִּמְלְאוּ יְמֵי אֱלִישֶׁבַע לָלֶדֶת וַתֵּלֶד בֵּן׃

נח וַיִּשְׁמְעוּ שְׁכֵנֶיהָ וּקְרוֹבֶיהָ כִּי־הִגְדִּיל יְהוָֹה אֶת־חַסְדּוֹ עִמָּהּ וַיִּשְׂמְחוּ אִתָּה׃

נט וַיְהִי בַּיּוֹם הַשְּׁמִינִי וַיָּבֹאוּ לָמוּל אֶת־הַיָּלֶד וַיִּקְרְאוּ אֶת־שְׁמוֹ זְכַרְיָה עַל־שֵׁם אָבִיו׃

ס וַתַּעַן אִמּוֹ וַתּׂאמַר לׂא כִּי יוֹחָנָן יִקָּרֵא לוֹ׃

סא וַיּׂאמְרוּ אֵלֶיהָ אֵין־אִישׁ בְּמִשְׁפַּחְתֵּךְ אֲשֶׁר שְׁמוֹ כַּשֵּׁם הַזֶּה׃

סב וַיִּרְמְזוּ אֶל־אָבִיו לָדַעַת מָה הַשֵּׁם אֲשֶׁר יִקָּרֵא לוֹ׃

סג וַיִּשְׁאַל לוּחַ וַיִּכְתּׂב עָלָיו לֵאמׂר יוֹחָנָן שְׁמוֹ וַיִּתְמְהוּ כֻּלָּם׃

סד וַיִּפָּתַח פִּיו וּלְשׁוֹנוֹ פִּתְאׂם וַיְדַבֵּר וַיְבָרֶךְ אֶת־הָאֱלׂהִים׃

סה וַתִּפּׂל אֵימָה עַל־כָּל־שְׁכֵנֵיהֶם וַיְסֻפַּר כָּל־הַדְּבָרִים הָאֵלֶּה בְּכָל־הָרֵי יְהוּדָה׃

סו וַיָּשִׂימוּ כָל־הַשּׁׂמְעִים אֶל־לִבָּם לֵאמׂר מָה־אֵפוֹא יִהְיֶה הַיֶּלֶד הַזֶּה וְיַד־יְהוָֹה הָיְתָה עִמּוֹ׃

סז וַיִּמָּלֵא זְכַרְיָה אָבִיו רוּחַ הַקּׂדֶשׁ וַיִּנָּבֵא לֵאמׂר׃

סח בָּרוּךְ יְהוָֹה אֱלׂהֵי יִשְׂרָאֵל כִּי פָקַד אֶת־עַמּוֹ וַיִּשְׁלַח לוֹ פְּדוּת׃

סט וַיַּצְמַח לָנוּ קֶרֶן יְשׁוּעָה בְּבֵית דָּוִד עַבְדּוֹ׃

ע כַּאֲשֶׁר דִּבֶּר בְּפִי־נְבִיאָיו הַקְּדוֹשִׁים אֲשֶׁר מֵעוֹלָם׃

עא יְשׁוּעָה מֵאׂיְבֵינוּ וּמִיַּד כָּל־שׂנְאֵינוּ׃

עב לַעֲשׂוֹת חֶסֶד עִם־אֲבוֹתֵינוּ וְלִזְכּׂר אֶת־בְּרִית קָדְשׁוֹ׃

עג אֶת־הַשְּׁבוּעָה אֲשֶׁר נִשְׁבַּע לְאַבְרָהָם אָבִינוּ׃

עד לְהַצִּילֵנוּ מִיַּד אׂיְבֵינוּ וּלְתִתֵּנוּ לְעָבְדוֹ בְּלִי־פָחַד׃

עה בְּתָמִים וּבִצְדָקָה לְפָנָיו כָּל־יְמֵי חַיֵּינוּ׃

עו וְאַתָּה הַיֶּלֶד נְבִיא עֶלְיוֹן יִקָּרֵא לָךְ כִּי לִפְנֵי יְהוָֹה תֵּלֵךְ לְפַנּוֹת אֶת־דְּרָכָיו׃

עז וּלְהוֹרוֹת דֶּרֶךְ הַיְשׁוּעָה לְעַמּוֹ בִּסְלִיחַת חַטּׂאתֵיהֶם׃

עח בְּחֶסֶד אֱלׂהֵינוּ וּבְרַחֲמָיו אֲשֶׁר בָּהֶם יִפְקְדֵנוּ הַנּׂגַהּ מִמָּרוֹם׃

עט לְהָאִיר לְישְׁבֵי חשֶׁךְ וְצַלְמָוֶת וּלְהָכִין אֶת־רַגְלֵינוּ אֶל־דֶּרֶךְ הַשָּׁלוֹם׃

פ וַיִּגְדַּל הַיֶּלֶד וַיֶּחֱזַק בָּרוּחַ וַיְהִי בַמִּדְבָּרוֹת עַד־יוֹם הֵרָאׂתוֹ אֶל־יִשְׂרָאֵל׃