Galatians 1

א פּוֹלוֹס הַשָּׁלִיחַ לׂא מִבְּנֵי אָדָם וְלׂא עַל־יְדֵי בֶן־אָדָם כִּי אִם־עַל־יְדֵי יֵשׁוּעַ הַמָּשִׁיחַ וֵאלׂהִים הָאָב אֲשֶׁר הֱעִירוֹ מִן־הַמֵּתִים׃

ב וְכָל־הָאַחִים אֲשֶׁר עִמָּדִי אֶל־הַקְּהִלּוֹת אֲשֶׁר בְּגָלַטְיָא׃

ג חֶסֶד לָכֶם וְשָׁלוֹם מֵאֵת הָאֱלׂהִים אָבִינוּ וּמֵאֵת אֲדׂנֵינוּ יֵשׁוּעַ הַמָּשִׁיחַ׃

ד אֲשֶׁר־נָתַן אֶת־נַפְשׁוֹ עַל־חַטּׂאתֵינוּ לְחַלְּצֵנוּ מִן־הָעוֹלָם הָרָע הַזֶּה כִּרְצוֹן אֱלׂהֵינוּ אָבִינוּ׃

ה אֲשֶׁר־לוֹ הַכָּבוֹד לְעוֹלְמֵי עוֹלָמִים אָמֵן׃

ו תָּמֵהַּ אֲנִי כִּי־סַרְתֶּם מַהֵר מֵאַחֲרֵי הַקּׂרֵא אֶתְכֶם בְּחֶסֶד הַמָּשִׁיחַ לִשְׁמׂעַ אֶל־בְּשׂוֹרָה זָרָה׃

ז וְהִיא אֵינֶנָּה אַחֶרֶת רַק יֵשׁ אֲנָשִׁים הָעׂכְרִים אֶתְכֶם וַחֲפֵצִים לַהֲפׂךְ אֶת־בְּשׂוֹרַת הַמָּשִׁיחַ׃

ח אֲבָל גַּם־אֲנַחְנוּ אוֹ־מַלְאָךְ מִן־הַשָּׁמַיִם אִם־יָבוֹא לְבַשֵׂר אֶתְכֶם בְּשׂוֹרָה מִבַּלְעֲדֵי זׂאת אֲשֶׁר בִּשַׂרְנוּ אֶתְכֶם חֵרֶם יִהְיֶה׃

ט כַּאֲשֶׁר אָמַרְנוּ כְבָר כֵּן־אׂמַר עַתָּה עוֹד־הַפָּעַם אִישׁ כִּי־יְבַשֵׂר אֶתְכֶם בְּשׂוֹרָה מִבַּלְעֲדֵי אֲשֶׁר קִבַּלְתֶּם חֵרֶם יִהְיֶה׃

י כִּי הֲמִתְרַצֶּה אֶל־בְּנֵי אָדָם אָנׂכִי אוֹ אֶל־הָאֱלׂהִים אִם הַמְבַקֵּשׁ אָנׂכִי לִמְצׂא־חֵן בְּעֵינֵי בְנֵי־אָדָם הֵן בְּמָצְאִי חֵן בְּעֵינֵי בְנֵי־אָדָם לׂא־אֶהְיֶה עֶבֶד הַמָּשִׁיחַ׃

יא וּמוֹדִיעַ אֲנִי אֶתְכֶם אֶחָי כִּי הַבְּשׂוֹרָה אֲשֶׁר בִּשַׂרְתִּי לׂא־לְאָדָם הִיא׃

יב כִּי אַף לׂא מֵאָדָם קִבַּלְתִּיהָ וְלׂא־מְלֻמֶּדֶת הִיא לִי כִּי אִם־בְּחֶזְיוֹן יֵשׁוּעַ הַמָּשִׁיחַ׃

יג כִּי הֲלׂא־שְׁמַעְתֶּם אֶת־דַּרְכִּי מִלְפָנִים בַּדָּת הַיְּהוּדִית וְאֵת אֲשֶׁר־תַּכְלִית רְדִיפָה רָדַפְתִּי אֶת־עֲדַת אֱלׂהִים וְהֶחֱרַמְתִּיהָ׃

יד וָאֱהִי הוֹלֵךְ וְחָזֵק בַּדָּת הַיְּהוּדִית עַל־רַבִּים מִבְּנֵי גִילִי בְּעַמִּי בְּקִנְאָתִי הַגְּדוֹלָה לְקַבָּלוֹת שֶׁל־אֲבוֹתָי׃

טו וּכְשֶׁהָיָה רָצוֹן מִלִּפְנֵי הָאֱלׂהִים הַמַּבְדִּיל אׂתִי מֵרֶחֶם אִמִּי וַיִּקְרָאֵנִי בְּחַסְדּוֹ׃

טז לְגַלּוֹת בִּי אֶת־בְּנוֹ לְמַעַן אֲבַשְׂרֶנּוּ בַּגּוֹיִם אָז לׂא נוֹעַצְתִּי עִם־בָּשָׂר וָדָם׃

יז גַּם לׂא־עָלִיתִי יְרוּשָׁלַיְמָה אֶל־אֲשֶׁר הָיוּ שְׁלִיחִים לְפָנָי כִּי אִם־הָלַכְתִּי לַעֲרָב וּמִשָּׁם שַׁבְתִּי אֶל־דַּמָּשֶׂק׃

יח אַחֲרֵי־כֵן מִקֵּץ שָׁלשׁ שָׁנִים עָלִיתִי לִירוּשָׁלַיִם לִרְאוֹת אֶת־כֵּיפָא וָאֵשֵׁב עִמּוֹ חֲמִשָּׁה עָשָׂר יוֹם׃

יט וְאַחֵר מִן־הַשְׁלִיחִים לׂא־רָאִיתִי זוּלָתִי אֶת־יַעֲקׂב אֲחִי אֲדׂנֵינוּ׃

כ וַאֲשֶׁר אֲנִי כׂתֵב אֲלֵיכֶם הִנֵּה נֶגֶד הָאֱלׂהִים כִּי לׂא אֲכַזֵּב׃

כא אַחֲרֵי־כֵן בָּאתִי אֶל־גְּלִילוֹת סוּרְיָא וְקִילִיקְיָא׃

כב וּקְהִלּוֹת יְהוּדָה אֲשֶׁר בַּמָּשִׁיחַ הֵנָּה לׂא יָדְעוּ אֶת־פָּנָי׃

כג רַק־זׂאת בִּלְבַד שָׁמְעוּ כִּי־הָרׂדֵף אׂתָנוּ מֵאָז עַתָּה מְבַשֵׂר אֶת־הָאֱמוּנָה אֲשֶׁר הֶחֱרִים מִלְּפָנִים׃

כד וַיְהַלֲלוּ בִי אֶת־הָאֱלׂהִים׃