1Peter 1

א פֶּטְרוֹס שְׁלִיחַ יֵשׁוּעַ הַמָּשִׁיחַ אֶל־תּוֹשְׁבֵי תְפוּצוֹת פָּנְטוֹס גָּלַטְיָא קַפּוֹדְקִיָּא אַסְיָא וּבִיתִינְיָא׃

ב הַנִּבְחָרִים מִדַּעַת אֱלׂהִים הָאָב מִקֶּדֶם בְּקִדּוּשׁ הָרוּחַ אֶל־מִשְׁמַעַת יֵשׁוּעַ הַמָּשִׁיחַ וְאֶל־הַזָּיַת דָּמוֹ חֶסֶד וְשָׁלוֹם לְמַכְבִּיר יִהְיוּ לָכֶם׃

ג בָּרוּךְ הָאֱלׂהִים אֲבִי אֲדׂנֵינוּ יֵשׁוּעַ הַמָּשִׁיחַ אֲשֶׁר כְּרׂב רַחֲמָיו חָזַר וְיָלַד אׂתָנוּ לְתִקְוָה חַיָּה בַּהֲקָמַת יֵשׁוּעַ הַמָּשִׁיחַ מֵעִם הַמֵּתִים׃

ד לְנַחֲלָה אֲשֶׁר לׂא תִּשָּׁחֵת וְלׂא תְגׂאַל וְלׂא תִבֹּל הַצְּפוּנָה לָכֶם בַּשָּׁמָיִם׃

ה הַשְּׁמוּרִים בְּעׂז אֱלׂהִים עַל־יַד הָאֱמוּנָה לַתְּשׁוּעָה הָעֲתִידָה לְהִגָּלוֹת לְעֶת־קֵץ׃

ו אֲשֶׁר בָּהּ תָּגִילוּ אַתֶּם הַמִּתְעַצְּבִים עַתָּה מְעַט לְפִי הַצּׂרֶךְ בְּמַסּׂת שׁׂנוֹת׃

ז לְמַעַן תִּמָּצֵא אֱמוּנַתְכֶם הַמְזֻקָּקָה יְקָרָה הַרְבֵּה מִן־הַזָּהָב הָאׂבֵד הַצָּרוּף בָּאֵשׁ לִתְהִלָּה וּלְכָבוֹד וּלְתִפְאֶרֶת בְּהִתְגַּלּוֹת יֵשׁוּעַ הַמָּשִׁיחַ׃

ח אֲשֶׁר אֲהַבְתֶּם וְלׂא רְאִיתֶם וַאֲשֶׁר תַּאֲמִינוּ בוֹ עַתָּה וְאֵינְכֶם רׂאִים אׂתוֹ וּבְכֵן תָּגִילוּ בְּשִׂמְחָה מְפׂאָרָה עָצְמָה מִסַּפֵּר׃

ט לָשֵׂאת עֵקֶב אֱמוּנַתְכֶם תְּשׁוּעָה לְנַפְשׁׂתֵיכֶם׃

י אֵת הַתְּשׁוּעָה אֲשֶׁר עָלֶיהָ חָקְרוּ וְדָרְשׁוּ הַנְּבִיאִים הַנִּבְּאִים עַל־הַחֶסֶד הַצָּפוּן לָכֶם׃

יא לַחְקׂר לָדַעַת מַה־זּוּ וְאֵי־זוּ הָעֵת אֲשֶׁר הוֹדִיעָהּ רוּחַ הַמָּשִׁיחַ אֲשֶׁר בְּקִרְבָּם בְּהַגִּידוֹ מֵרׂאשׁ אֵת עִנּוּיֵי הַמָּשִׁיחַ וְאֶת־הַגְּדֻלּוֹת אֲשֶׁר אַחֲרֵיהֶם׃

יב וְנִגְלָה לָהֶם אֲשֶׁר לׂא לְנַפְשָׁם כִּי אִם־לָנוּ הָיוּ מְשַׁמְּשִׁים בַּדְּבָרִים הָהֵם אֲשֶׁר הֻגַּד לָכֶם עַתָּה עַל־פִּי הַמְבַשְׂרִים אֶתְכֶם בְּרוּחַ הַקּׂדֶשׁ הַשָּׁלוּחַ מִשָּׁמַיִם דְּבָרִים אֲשֶׁר מַלְאֲכֵי אֱלׂהִים חָמְדוּ לְהַשְׁקִיף אֶל־תּוֹכָם׃

יג לָכֵן חִגְרוּ מָתְנֵי שִׂכְלְכֶם הִתְעוֹרֲרוּ וְקַוּוּ בְכָל־נַפְשְׁכֶם לַחֶסֶד אֲשֶׁר יְבוֹאֲכֶם בְּהִתְגַּלּוֹת יֵשׁוּעַ הַמָּשִׁיחַ׃

יד כִּבְנֵי מִשְׁמַעַת אַל־תִּתְנַהֲגוּ כַּתַּאֲוֹת אֲשֶׁר הִתְאַוִּיתֶם בְּעוֹד הֱיוֹתְכֶם בִּבְלִי־דָעַת׃

טו כִּי אִם־הֱיוּ קְדׂשִׁים בְּכָל־דַּרְכֵיכֶם כַּאֲשֶׁר הַקּׂרֵא אֶתְכֶם קָדוֹשׁ הוּא׃

טז כִּי עַל־כֵּן כָּתוּב וִהְיִיתֶם קְדׂשִׁים כִּי קָדוֹשׁ אָנִי׃

יז וְאִם־תִּקְרְאוּ אָב לֵאלׂהִים הַשּׁׂפֵט בִּבְלִי מַשּׂא פָנִים כְּמַעַלְלֵי אִישׁ וָאִישׁ הִתְהַלְּכוּ־נָא בְיִרְאָה בִּימֵי מְגוּרֵיכֶם׃

יח מִפְּנֵי שֶׁיּׂדְעִים אַתֶּם כִּי לׂא־בְדָבָר נִפְסָד לׂא בְכֶסֶף וְלׂא בְזָהָב נִפְדֵּיתֶם מִדֶּרֶךְ הַבְלְכֶם אֲשֶׁר הָנְחַלְתֶּם מֵאֵת אֲבוֹתֵיכֶם׃

יט כִּי אִם־בְּדַם יָקָר שֶׁל־שֶׂה תָמִים שֶׁאֵין־בּוֹ מוּם בְּדַם הַמָּשִׁיחַ׃

כ הַנּוֹדָע מֵרׂאשׁ לִפְנֵי מוֹסְדוֹת תֵּבֵל וְנִגְלָה בְּאַחֲרִית הַיָּמִים לְמַעַנְכֶם׃

כא הַמַּאֲמִינִים עַל־פִּיו בֵּאלׂהִים אֲשֶׁר הֵקִים אׂתוֹ מֵעִם הַמֵּתִים וַיִּתֶּן־לוֹ כָבוֹד לְמַעַן הֱיוֹת אֱמוּנַתְכֶם תִּקְוָה לֵאלׂהִים׃

כב זַכּוּ אֶת־נַפְשׁׂתֵיכֶם עַל־יְדֵי הָרוּחַ בְּשָׁמְעֲכֶם בְּקוֹל הָאֱמֶת לְאַחֲוָה שֶׁאֵין בָּהּ חֲנֻפָּה וַאֲהַבְתֶּם אִישׁ אֶת־רֵעֵהוּ אַהֲבָה עַזָּה בְּלֵב טָהוֹר׃

כג כַּנּוֹלָדִים שֵׁנִית לׂא מִזֶּרַע נִשְׁחָת כִּי אִם־מִזֶּרַע לׂא יִשָּׁחֵת בַּמַּאֲמָר שֶׁל־אֱלׂהִים הַחַי וְהַקַּיָּם לְעוֹלָם׃

כד כִּי כָל־בָּשָׂר חָצִיר וְכָל־כְּבוֹד אִישׁ כְּצִיץ הַשָׂדֶה׃

כה יָבֵשׁ חָצִיר נָבֵל צִיץ וּדְבַר יְהוָֹה יָקוּם לְעוֹלָם וְהוּא הַדָּבָר אֲשֶׁר בֻּשַׂר לָכֶם׃