Mark 13

א וַיְהִי בְּצֵאתוֹ מִן־הַמִּקְדָּשׁ וַיּׂאמֶר אֵלָיו אֶחָד מִתַּלְמִידָיו רַבִּי רְאֵה מַה־יָּפוּ הָאֲבָנִים וְהַבִּנְיָנִים הָאֵלֶּה׃

ב וַיַּעַן אׂתוֹ יֵשׁוּעַ וַיּׂאמַר הֲרָאִיתָ אֶת־הַבִּנְיָנִים הַגְּדוֹלִים הָאֵלֶּה לׂא־תִּשָּׁאֵר אֶבֶן עַל־אֶבֶן אֲשֶׁר לׂא תִתְפָּרָק׃

ג וַיֵּשֶׁב עַל־הַר הַזֵּיתִים מִמּוּל הַמִּקְדָּשׁ וַיִּשְׁאָלֻהוּ פֶטְרוֹס וְיַעֲקׂב וְיוֹחָנָן וְאַנְדְּרַי וְהֵם לְבַדָּם אִתּוֹ׃

ד אֱמָר־נָא לָנוּ מָתַי תִּהְיֶה־זּׂאת וּמַה־הוּא הָאוֹת בְּבֹא הָעֵת אֲשֶׁר תֵּעָשֶׂה־בָּהּ כָּל־זׂאת׃

ה וַיַּעַן יֵשׁוּעַ וַיְדַבֵּר אֲלֵיהֶם הִשָּׁמְרוּ לָכֶם פֶּן־יַתְעֶה אֶתְכֶם אִישׁ׃

ו כִּי רַבִּים יָבֹאוּ בִּשְׁמִי לֵאמׂר אֲנִי הוּא וְהִתְעוּ רַבִּים׃

ז וּבְשָׁמְעֲכֶם מִלְחָמוֹת וּשְׁמֻעוֹת מִלְחָמָה אַל־תִּבָּהֵלוּ כִּי־הָיוֹ תִהְיֶה זׂאת וְעוֹד לׂא בָא הַקֵּץ׃

ח כִּי־יָקוּם גּוֹי עַל־גּוֹי וּמַמְלָכָה עַל־מַמְלָכָה וְהָיָה רַעַשׁ כּׂה וָכׂה וְהָיָה רָעָב וּמְהוּמָה׃

ט אֵלֶּה רֵאשִׁית הַחֲבָלִים וְאַתֶּם הִשָּׁמְרוּ בְנַפְשׁׂתֵיכֶם כִּי־יִמְסְרוּ אֶתְכֶם לְסַנְהֶדְרִיּוֹת וְהֻכֵּיתֶם בְּבָתֵּי כְנֵסִיּוֹת וְלִפְנֵי נְגִידִים וּמְלָכִים תּוּבְאוּ לְמַעֲנִי לְעֵדוּת לָהֶם׃

י וְהַבְּשׂוֹרָה צְרִיכָה לְהִקָּרֵא בָרִאשׁׂנָה לְכָל־הַגּוֹיִם׃

יא וְכַאֲשֶׁר יוֹלִיכוּ וּמָסְרוּ אֶתְכֶם אַל־תִּדְאֲגוּ וְאַל־תְּחַשְּׁבוּ מַה־תְּדַבֵּרוּ כִּי הַדָּבָר אֲשֶׁר יוּשַׂם בְּפִיכֶם בַּשָּׁעָה הַהִיא אוֹתוֹ תְדַבֵּרוּ יַעַן אֲשֶׁר לׂא־אַתֶּם הַמְדַבְּרִים כִּי אִם־רוּחַ הַקּׂדֶשׁ׃

יב וְאָח יִמְסׂר אֶת־אָחִיו לַמָּוֶת וְאָב אֶת־בְּנוֹ וְקָמוּ בָנִים בַּאֲבוֹתָם וְהֵמִיתוּ אוֹתָם׃

יג וִהְיִיתֶם שְׂנוּאִים לַכּׂל לְמַעַן שְׁמִי וְהַמְחַכֶּה עַד־עֵת קֵץ הוּא יִוָּשֵׁעַ׃

יד וְכִי תִרְאוּ אֶת־שִׁקּוּץ מְשׁׂמֵם אֲשֶׁר אָמַר דָּנִיֵּאל הַנָּבִיא עׂמֵד בַּמָּקוֹם אֲשֶׁר לׂא־לוֹ הַקּוֹרֵא יָבִין אָז נוֹס יָנוּסוּ אַנְשֵׁי יְהוּדָה אֶל־הֶהָרִים׃

טו וַאֲשֶׁר עַל־הַגָּג אַל־יֵרֵד הַבַּיְתָה וְאַל־יָבֹא בוֹ לָשֵׂאת דָּבָר מִבֵּיתוֹ׃

טז וַאֲשֶׁר בַּשָׂדֶה אַל־יָשׁׂב הַבַּיְתָה לָשֵׂאת מַלְבּוּשׁוֹ׃

יז וְאוֹי לֶהָרוֹת וְלַמֵּינִיקוֹת בַּיָּמִים הָהֵמָּה׃

יח אַךְ הִתְפַּלֲלוּ אֲשֶׁר לׂא־תִהְיֶה מְנוּסַתְכֶם בַּחׂרֶף׃

יט כִּי הַיָּמִים הָהֵם יִהְיוּ עֵת צָרָה אֲשֶׁר לׂא־נִהְיְתָה כָמוֹהָ מֵרֵאשִׁית הַבְּרִיאָה אֲשֶׁר בָּרָא אֱלׂהִים עַד־עַתָּה וְכָמוֹהָ לׂא־תִהְיֶה עוֹד׃

כ וְלוּלֵי קִצֵּר יְהוָֹה אֶת־הַיָּמִים הָהֵם לׂא־יִוָּשַׁע כָּל־בָּשָׂר אַךְ לְמַעַן הַבְּחִירִים אֲשֶׁר בָּחַר בָּם קִצֵּר אֶת־הַיָּמִים׃

כא וְאָז אִם־יׂאמַר אֲלֵיכֶם אִישׁ הִנֵּה־פׂה הַמָּשִׁיחַ אוֹ הִנֵּהוּ שָׁם אַל־תַּאֲמִינוּ׃

כב כִּי יָקוּמוּ מְשִׁיחֵי שֶׁקֶר וּנְבִיאֵי שָׁקֶר וְנָתְנוּ אׂתוֹת וּמוֹפְתִים לְהַתְעוֹת אַף אֶת־הַבְּחִירִים אִם־יוּכָלוּ׃

כג וְאַתֶּם רְאוּ הִנֵּה מֵרׂאשׁ הִגַּדְתִּי לָכֶם אֶת־כּׂל׃

כד וְהָיָה בַּיָּמִים הָהֵם אַחֲרֵי הַצָּרָה הַהִיא תֶּחְשַׁךְ הַשֶּׁמֶשׁ וְהַיָּרֵחַ לׂא־יַגִּיהַּ אוֹרוֹ׃

כה וְהַכּוֹכָבִים יִפְּלוּ מִן־הַשָּׁמַיִם וַחֲיָלֵי הַשָּׁמַיִם יִתְמוֹטָטוּ׃

כו וְאָז יִרְאוּ אֶת־בֶּן־הָאָדָם בָּא בַעֲנָנִים בִּגְבוּרָה רַבָּה וּבְכָבוֹד׃

כז וְאָז יִשְׁלַח אֶת־מַלְאָכָיו וִיקַבֵּץ אֶת־בְּחִירָיו מֵאַרְבַּע הָרוּחוֹת מִקְצֵה הָאָרֶץ עַד־קְצֵה הַשָּׁמָיִם׃

כח וּמִן־הַתְּאֵנָה לִמְדוּ־נָא אֶת־מְשַׁל הַדָּבָר כְּשֶׁיִּרְטַב עֲנָפָהּ וּפָרַח עָלֶהָ יְדַעְתֶּם כִּי קָרוֹב הַקָּיִץ׃

כט כֵּן גַּם־אַתֶּם בִּרְאׂתְכֶם כִּי־הָיוּ אֵלֶּה דְּעוּ כִּי־קָרוֹב הוּא בַּפָּתַח׃

ל אָמֵן אׂמֵר אֲנִי לָכֶם לׂא יַעֲבֹר הַדּוֹר הַזֶּה עַד אֲשֶׁר־יִהְיוּ כָּל־אֵלֶּה׃

לא הַשָּׁמַיִם וְהָאָרֶץ יַעֲבֹרוּ וּדְבָרַי לׂא יַעֲבֹרוּן׃

לב אַךְ עֶת־בּוֹא הַיּוֹם הַהוּא וְהַשָּׁעָה הַהִיא אֵין אִישׁ יוֹדֵעַ גַּם־לׂא מַלְאֲכֵי הַשָּׁמַיִם גַּם־לׂא הַבֵּן מִבַּלְעֲדֵי הָאָב׃

לג רְאוּ שִׁקְדוּ וְהִתְפַּלֵּלוּ כִּי לׂא יְדַעְתֶּם מָתַי הָעֵת׃

לד וְהָיָה כְּאִישׁ הוֹלֵךְ לַמֶּרְחָק אֲשֶׁר עָזַב אֶת־בֵּיתוֹ וַיִּתֵּן רָשׁוּת לַעֲבָדָיו וּלְאִישׁ אֶת־מְלַאכְתּוֹ וְאֶת־הַשׂוֹעֵר צִוָּה לִשְׁקׂד׃

לה לָכֵן שִׁקְדוּ כִּי לׂא יְדַעְתֶּם מָתַי יָבוֹא בַּעַל הַבָּיִת אִם־בָּעֶרֶב אוֹ־בַחֲצוֹת הַלַּיְלָה אִם־בְּעֵת קְרִיאַת הַתַּרְנְגוֹל אוֹ בַבֹּקֶר׃

לו פֶּן־יָבוֹא פִתְאׂם וּמָצָא אֶתְכֶם יְשֵׁנִים׃

לז וְאֵת אֲשֶׁר אָמַרְתִּי לָכֶם הִנְנִי אׂמֵר לַכּׂל שְׁקׂדוּ׃