Mark 10

א וַיָּקָם מִשָּׁם וַיֵּלֶךְ אֶל־גְּבוּל יְהוּדָה מֵעֵבֶר הַיַּרְדֵּן וַיִּקָּהֲלוּ עוֹד אֵלָיו הֲמוֹן עָם וַיְלַמְּדֵם כְּפַעַם בְּפָעַם׃

ב וַיִּגְּשׁוּ אֵלָיו הַפְּרוּשִׁים לְנַסּוֹתוֹ וַיִּשְׁאָלֻהוּ וַיּׂאמְרוּ הֲיוּכַל אִישׁ לְשַׁלַּח אֶת־אִשְׁתּוֹ׃

ג וַיַּעַן וַיּׂאמֶר אֲלֵיהֶם מַה־צִּוָּה אֶתְכֶם משֶׁה׃

ד וַיּׂאמְרוּ משֶׁה הִתִּיר לִכְתּׂב סֵפֶר כְּרִיתֻת וּלְשַׁלֵּחַ׃

ה וַיַּעַן יֵשׁוּעַ וַיּׂאמֶר אֲלֵיהֶם מִפְּנֵי קְשִׁי לְבַבְכֶם כָּתַב לָכֶם אֶת־הַמִּצְוָה הַזּׂאת׃

ו אֲבָל מֵרֵאשִׁית הַבְּרִיאָה זָכָר וּנְקֵבָה בָּרָא אׂתָם אֱלׂהִים׃

ז עַל־כֵּן יַעֲזָב־אִישׁ אֶת־אָבִיו ואֶת־אִמּוֹ וְדָבַק בְּאִשְׁתּוֹ׃

ח וְהָיוּ שְׁנֵיהֶם לְבָשָׂר אֶחָד וְאִם־כֵּן אֵפוֹא אֵינָם עוֹד שְׁנַיִם כִּי אִם־בָּשָׂר אֶחָד׃

ט לָכֵן אֵת אֲשֶׁר־חִבַּר אֱלׂהִים לׂא יַפְרִידֶנּוּ אָדָם׃

י וַיְהִי בַּבָּיִת וַיָּשׁוּבוּ תַלְמִידָיו לִשְׁאׂל אׂתוֹ עַל־זׂאת׃

יא וַיּׂאמֶר אֲלֵיהֶם הַמְשַׁלֵּחַ אֶת־אִשְׁתּוֹ וְלׂקֵחַ אַחֶרֶת נׂאֵף הוּא עָלֶיהָ׃

יב וְאִשָּׁה כִּי תַעֲזׂב אִישָׁהּ וְהָיְתָה לְאִישׁ אַחֵר נׂאֶפֶת הִיא׃

יג וַיָּבִיאוּ אֵלָיו יְלָדִים לְמַעַן יִגַּע בָּהֶם וַיִּגְעֲרוּ הַתַּלְמִידִים בַּמְּבִיאִים אׂתָם׃

יד וַיַּרְא יֵשׁוּעַ וַיֵּרַע לוֹ וַיּׂאמֶר אֲלֵיהֶם הַנִּיחוּ לַיְלָדִים לָבוֹא אֵלַי וְאַל־תִּמְנָעוּם כִּי לְאֵלֶּה מַלְכוּת הָאֱלׂהִים׃

טו אָמֵן אׂמֵר אֲנִי לָכֶם כּׂל אֲשֶׁר־לׂא יְקַבֵּל אֶת־מַלְכוּת הָאֱלׂהִים כַּיֶּלֶד לׂא־יָבֹא בָהּ׃

טז וַיְחַבְּקֵם וַיָּשֶׁת יָדָיו עֲלֵיהֶם וַיְבָרֲכֵם׃

יז וַיְהִי בְּצֵאתוֹ לַדֶּרֶךְ וְהִנֵּה־אִישׁ רָץ לִקְרָאתוֹ וַיִּכְרַע לְפָנָיו וַיִּשְׁאַל אוֹתוֹ לֵאמׂר רַבִּי הַטּוֹב מָה אֶעֱשֶׂה וְאִירַשׁ חַיֵּי עוֹלָם׃

יח וַיּׂאמֶר לוֹ יֵשׁוּעַ מַדּוּעַ קָרָאתָ לִּי טוֹב אֵין טוֹב כִּי אִם אֶחָד וְהוּא הָאֱלׂהִים׃

יט הֵן יָדַעְתָּ אֶת־הַמִּצְוֹת לׂא תִנְאָף לׂא תִרְצָח לׂא תִגְנׂב לׂא־תַעֲנֶה עֵד שָׁקֶר לׂא תַעֲשׁׂק כַּבֵּד אֶת־אָבִיךָ וְאֶת־אִמֶּךָ׃

כ וַיַּעַן וַיּׂאמֶר אֵלָיו רַבִּי אֶת־כָּל־אֵלֶּה שָׁמַרְתִּי מִנְּעוּרָי׃

כא וַיַּבֶּט־בּוֹ יֵשׁוּעַ וַיֶּאֱהָבֵהוּ וַיּׂאמֶר אֵלָיו אַחַת חָסַרְתָּ לֵךְ מְכׂר אֶת־כָּל־אֲשֶׁר־לְךָ וְתֵן לָעֲנִיִּים וִיהִי־לְךָ אוֹצָר בַּשָּׁמָיִם וּבוֹא שָׂא אֶת־הַצְּלוּב וְלֵךְ אַחֲרָי׃

כב וַיֵּצֶר־לוֹ עַל־הַדָּבָר הַזֶּה וַיֵּעָצֵב וַיֵּלֶךְ לוֹ כִּי־הוֹן רַב הָיָה לוֹ׃

כג וַיַּבֵּט יֵשׁוּעַ סָבִיב וַיּׂאמֶר אֶל־תַּלְמִידָיו כַּמָּה יִקְשֶׁה לְבַעֲלֵי נְכָסִים לָבוֹא בְּמַלְכוּת הָאֱלׂהִים׃

כד וַיִּבָּהֲלוּ הַתַּלְמִידִים עַל־דְּבָרָיו וַיּׂסֶף יֵשׁוּעַ וַיַּעַן וַיּׂאמֶר לָהֶם בָּנַי מֶה קָשֶׁה לַבֹּטְחִים עַל־חֵילָם לָבוֹא אֶל־מַלְכוּת הָאֱלׂהִים׃

כה נָקֵל לַגָּמָל לַעֲבֹר בְּנֶקֶב הַמַּחַט מִבּוֹא עָשִׁיר אֶל־מַלְכוּת הָאֱלׂהִים׃

כו וַיּוֹסִיפוּ עוֹד לְהִשְׁתּוֹמֵם וַיּׂאמְרוּ אִישׁ אֶל־אָחִיו וּמִי־אֵפוֹא יוּכַל לְהִוָּשֵׁעַ׃

כז וַיַּבֶּט־בָּם יֵשׁוּעַ וַיּׂאמַר מִבְּנֵי אָדָם תִּפָּלֵא זׂאת אַךְ לׂא מֵאֱלׂהִים כִּי מֵאֱלׂהִים לׂא יִפָּלֵא כָּל־דָּבָר׃

כח וַיָּחֶל פֶּטְרוֹס לֵאמׂר אֵלָיו הֵן אֲנַחְנוּ עָזַבְנוּ אֶת־הַכּׂל וַנֵּלֶךְ אַחֲרֶיךָ׃

כט וַיַּעַן יֵשׁוּעַ וַיּׂאמֶר אָמֵן אׂמֵר אֲנִי לָכֶם כִּי אֵין אִישׁ אֲשֶׁר עָזַב אֶת־בֵּיתוֹ אוֹ אֶת־אֶחָיו אוֹ אֶת־אַחְיוֹתָיו אוֹ אֶת־אָבִיו אוֹ אֶת־אִמּוֹ אוֹ אֶת־אִשְׁתּוֹ אוֹ אֶת־בָּנָיו אוֹ אֶת שְׂדוֹתָיו לְמַעֲנִי וּלְמַעַן הַבְּשׂוֹרָה׃

ל אֲשֶׁר לׂא יִקַּח עַתָּה בַּזְּמַן הַזֶּה בְּכָל־הָרְדִיפוֹת מֵאָה פְעָמִים כָּהֵמָּה בָּתִּים וְאַחִים וַאֲחָיוֹת וְאִמּוֹת וּבָנִים וְשָׂדוֹת וְלָעוֹלָם הַבָּא חַיֵּי עוֹלָם׃

לא וְאוּלָם רַבִּים מִן־הָרִאשׁוֹנִים יִהְיוּ אַחֲרוֹנִים וְהָאַחֲרוֹנִים רִאשׁוֹנִים׃

לב וַיְהִי בַדֶּרֶךְ בַּעֲלוֹתָם יְרוּשָׁלַיִם וְיֵשׁוּעַ הוֹלֵךְ לִפְנֵיהֶם וְהֵמָּה נִבְהָלִים וְהוֹלְכִים אַחֲרָיו בַּחֲרָדָה וַיּוֹסֶף לָקַחַת אֵלָיו אֶת־שְׁנֵים הֶעָשָׂר וַיָּחֶל לְהַגִּיד לָהֶם אֶת־אֲשֶׁר יִקְרֵהוּ לֵאמׂר׃

לג הִנֵּה אֲנַחְנוּ עׂלִים יְרוּשָׁלָיְמָה וּבֶן־הָאָדָם יִמָּסֵר לְרָאשֵׁי הַכּׂהֲנִים וְלַסּוֹפְרִים וְיַרְשִׁיעֻהוּ לָמוּת וְיִמְסְרוּ אׂתוֹ לַגּוֹיִם׃

לד וִיהָתֵלּוּ בוֹ וְיַכֻּהוּ בַשׂוֹטִים וְיָרׂקּוּ בְּפָנָיו וִימִיתֻהוּ וּבַיּוֹם הַשְּׁלִישִׁי קוֹם יָקוּם׃

לה וַיִּקְרְבוּ אֵלָיו יַעֲקׂב וְיוֹחָנָן בְּנֵי זַבְדַּי וַיּׂאמְרוּ רַבִּי חֲפֵצִים אֲנַחְנוּ שֶׁתַּעֲשֶׂה לָנוּ אֶת־אֲשֶׁר נִשְׁאַל מִמֶּךָ׃

לו וַיּׂאמֶר אֲלֵיהֶם מָה־אִוִּיתֶם כִּי־אֶעֱשֶׂה לָכֶם׃

לז וַיּׂאמְרוּ אֵלָיו תְּנָה־לָּנוּ לָשֶׁבֶת אֶחָד לִימִינְךָ וְאֶחָד לִשְׂמׂאלְךָ בִּכְבוֹדֶךָ׃

לח וַיּׂאמֶר אֲלֵיהֶם יֵשׁוּעַ לׂא יְדַעְתֶּם אֵת אֲשֶׁר שְׁאַלְתֶּם הֲתוּכְלוּ לִשְׁתּוֹת אֶת־הַכּוֹס אֲשֶׁר אֲנִי שׁׂתֶה וּלְהִטָּבֵל הַטְּבִילָה אֲשֶׁר אֲנִי נִטְבָּל׃

לט וַיּׂאמְרוּ אֵלָיו נוּכָל וַיּׂאמֶר אֲלֵיהֶם יֵשׁוּעַ אֶת־הַכּוֹס אֲשֶׁר־אֲנִי שׁׂתֶה תִּשְׁתּוּ וְהַטְּבִילָה אֲשֶׁר אֲנִי נִטְבָּל תִּטָּבֵלוּ׃

מ אַךְ שֶׁבֶת לִימִינִי וְלִשְׂמׂאלִי אֵין בְּיָדִי לָתֵת בִּלְתִּי לְאֲשֶׁר הוּכַן לָהֶם׃

מא וַיְהִי כִּשְׁמׂעַ זׂאת הָעֲשָׂרָה וַיָּחֵלוּ לִכְעוֹס אֶל־יַעֲקׂב וְיוֹחָנָן׃

מב וַיִּקְרָא לָהֶם יֵשׁוּעַ וַיּׂאמֶר אֲלֵיהֶם אַתֶּם יְדַעְתֶּם כִּי הַנֶּחֱשָׁבִים לְהִשְׂתָּרֵר עַל־הַגּוֹיִם הֵם רׂדִים בָּהֶם וּגְדוֹלֵיהֶם שׁוֹלְטִים עֲלֵיהֶם׃

מג וְלׂא יִהְיֶה כֵן בְּקִרְבְּכֶם כִּי אִם־הֶחָפֵץ לִהְיוֹת גָּדוֹל בָּכֶם יִהְיֶה לָכֶם לִמְשָׁרֵת׃

מד וְהֶחָפֵץ לִהְיוֹת הָרׂאשׁ יִהְיֶה עֶבֶד לַכּׂל׃

מה כִּי בֶן־הָאָדָם גַּם־הוּא לׂא בָא לְמַעַן יְשָׁרֲתוּהוּ כִּי אִם־לְשָׁרֵת וְלָתֵת אֶת־נַפְשׁוֹ כּׂפֶר תַּחַת רַבִּים׃

מו וַיָּבֹאוּ יְרִיחוֹ וַיְהִי כְּצֵאתוֹ מִירִיחוֹ הוּא וְתַלְמִידָיו וַהֲמוֹן עַם רַב וְהִנֵּה בַּרְטִימַי בֶּן־טִימַי אִישׁ עִוֵּר יָשַׁב עַל־יַד הַדֶּרֶךְ לְבַקֵּשׁ צְדָקָה׃

מז וַיִּשְׁמַע כִּי הוּא יֵשׁוּעַ הַנָּצְרִי וַיָּחֶל לִצְעׂק וַיּׂאמַר אָנָּא בֶן־דָּוִד יֵשׁוּעַ חָנֵּנִי׃

מח וַיִּגְעֲרוּ־בוֹ רַבִּים לְהַחֲשׁׂתוֹ וְהוּא הִרְבָּה עוֹד לִזְעׂק בֶּן־דָּוִד חָנֵּנִי׃

מט וַיַּעֲמׂד יֵשׁוּעַ וַיּׂאמֶר קִרְאוּ־לוֹ וַיִּקְרְאוּ לָעִוֵּר וַיּׂאמְרוּ אֵלָיו חֲזַק קוּם קָרָא־לָךְ׃

נ וַיַּשְׁלֵךְ אֶת־שִׂמְלָתוֹ מֵעָלָיו וַיָּקָם וַיָּבֹא אֶל־יֵשׁוּעַ׃

נא וַיַּעַן יֵשׁוּעַ וַיּׂאמֶר אֵלָיו מַה־תִּרְצֶה שֶׁאֶעֱשֶׂה־לָּךְ וַיּׂאמֶר אֵלָיו הָעִוֵּר רַבּוּנִי אֲשֶׁר אֶרְאֶה׃

נב וַיּׂאמֶר יֵשׁוּעַ אֵלָיו לֶךְ־לְךָ אֱמוּנָתְךָ הוֹשִׁיעָה לָּךְ וּכְרֶגַע נִפְקְחוּ עֵינָיו וַיֵּלֶךְ אַחֲרֵי יֵשׁוּעַ בַּדָּרֶךְ׃