Acts 7

א וַיּׂאמֶר הַכּׂהֵן הַגָּדוֹל הַאֱמֶת דְּבָרָם׃

ב וַיַּעַן וַיּׂאמֶר אֲנָשִׁים אַחִים וְאָבוֹת שְׁמָעוּ אֱלׂהֵי הַכָּבוֹד נִרְאָה אֶל־אַבְרָהָם אָבִינוּ בִּהְיוֹתוֹ בַּאֲרַם נַהֲרַיִם טֶרֶם יֵשֵׁב בְּחָרָן׃

ג וַיּׂאמֶר אֵלָיו לֶךְ־לְךָ מֵאַרְצְךָ וּמִמּוֹלַדְתֶּךָ וּבֹא אֶל־הָאָרֶץ אֲשֶׁר אַרְאֲֶָ׃

ד וַיֵּצֵא מֵאֶרֶץ כַּשְׂדִּים וַיֵּשֶׁב בְּחָרָן וְאַחֲרֵי מוֹת אָבִיו הֶעֱבִיר אׂתוֹ מִשָּׁם אֶל־הָאָרֶץ הַזּׂאת אֲשֶׁר אַתֶּם ישְׁבִים בָּהּ כַּיּוֹם הַזֶּה׃

ה וְלׂא נָתַן לוֹ בָּהּ נַחֲלָה אַף־לׂא מִדְרַךְ כַּף־רָגֶל וַיַּבְטַח לְתִתָּהּ לַאֲחֻזָּה לוֹ וּלְזַרְעוֹ אַחֲרָיו בְּטֶרֶם הָיָה־לוֹ בֵּן׃

ו וַיּׂאמֶר לוֹ אֱלׂהִים כִּי־גֵר יִהְיֶה זַרְעוֹ בְּאֶרֶץ לׂא לָהֶם וַעֲבָדוּם וְעִנּוּ אׂתָם אַרְבַּע מֵאוֹת שָׁנָה׃

ז וְגַם אֶת־הַגּוֹי אֲשֶׁר יַעֲבֹדוּ דָּן אָנׂכִי אָמַר אֱלׂהִים וְאַחֲרֵי־כֵן יֵצְאוּ וְיַעַבְדוּנִי בַּמָּקוֹם הַזֶּה׃

ח וַיִּתֶּן־לוֹ אֶת־בְּרִית הַמִּילָה וְכֵן הוֹלִיד אֶת־יִצְחָק וַיָּמָל אׂתוֹ בַּיּוֹם הַשְּׁמִינִי וְיִצְחָק הוֹלִיד אֶת־יַעֲקׂב וְיַעֲקׂב הוֹלִיד אֶת־שְׁנֵים עָשָׂר הָאָבוֹת׃

ט וַיְקַנְאוּ הָאָבוֹת בְּיוֹסֵף וַיִּמְכְּרוּ אוֹתוֹ מִצְרָיְמָה וֵאלׂהִים הָיָה עִמּוֹ׃

י וַיַּצִּילֵהוּ מִכָּל־צָרוֹתָיו וַיִּתֶּן־לוֹ חֵן וְחָכְמָה לִפְנֵי פַרְעׂה מֶלֶךְ מִצְרָיִם וַיְשִׂימֵהוּ שַׁלִּיט עַל־מִצְרַיִם וְעַל כָּל־בֵּיתוֹ׃

יא וַיְהִי רָעָב עַל־כָּל־אֶרֶץ מִצְרַיִם וּכְנַעַן וְצָרָה גְדוֹלָה וַאֲבוֹתֵינוּ לׂא־מָצְאוּ אׂכֶל׃

יב וַיִּשְׁמַע יַעֲקׂב כִּי יֶשׁ־שֶׁבֶר בְּמִצְרָיִם וַיִּשְׁלַח־שָׁמָּה אֶת־אֲבוֹתֵינוּ בַּפַּעַם הָרִאשׁוֹנָה׃

יג וּבַפַּעַם הַשֵּׁנִית הִתְוַדַּע יוֹסֵף אֶל־אֶחָיו וּמוֹלֶדֶת יוֹסֵף נִגְלְתָה לְפַרְעׂה׃

יד וַיִּשְׁלַח יוֹסֵף וַיִּקְרָא לְיַעֲקׂב אָבִיו וּלְכָל־מִשְׁפַּחְתּוֹ שִׁבְעִים וְחָמֵשׁ נָפֶשׁ׃

טו וַיֵּרֶד יַעֲקׂב מִצְרָיְמָה וַיָּמָת הוּא וַאֲבוֹתֵינוּ׃

טז וַיּוּבְאוּ שְׁכֶמָה וַיּוּשְׂמוּ בַקֶּבֶר אֲשֶׁר קָנָה אַבְרָהָם בְּכַסְפּוֹ מִיַּד בְּנֵי־חֲמוֹר אֲבִי שְׁכֶם׃

יז וַיְהִי כַּאֲשֶׁר קָרְבָה עֵת הַשְּׁבוּעָה אֲשֶׁר נִשְׁבַּע אֱלׂהִים לְאַבְרָהָם וַיִּגְדַּל הָעָם וַיִּרֶב בְּמִצְרָיִם׃

יח עַד כִּי־קָם מֶלֶךְ אַחֵר אֲשֶׁר לׂא־יָדַע אֶת־יוֹסֵף׃

יט וְזֶה הִתְחַכֵּם לְמִשְׁפַּחְתֵּנוּ וַיָּרַע לַאֲבוֹתֵינוּ לְהַשְׁלִיךְ אֶת־עׂלֲלֵיהֶם אֶל־פְּנֵי הַשָּׂדֶה לְבִלְתִּי הַחֲיוֹתָם׃

כ בָּעֵת הַהִיא נוֹלַד משֶׁה וַיְהִי־טוֹב לֵאלׂהִים וַיְהִי אָמוּן בְּבֵית אָבִיו שְׁלשָׁה יְרָחִים׃

כא וְכַאֲשֶׁר הֻשְׁלַךְ אָסְפָה אׂתוֹ בַּת־פַּרְעׂה וַתְּגַדְּלֵהוּ לָהּ לְבֵן׃

כב וַיְלֻמַּד משֶׁה בְּכָל־חָכְמַת מִצְרָיִם וַיְהִי גִבּוֹר בִּדְבָרִים וּבְמַעֲשִׂים׃

כג וּבִמְלׂאת־לוֹ אַרְבָּעִים שָׁנָה עָלָה עַל־לִבּוֹ לִפְקׂד אֶת־אֶחָיו בְּנֵי יִשְׂרָאֵל׃

כד וַיַּרְא אִישׁ אֶחָד מֻכֶּה חִנָּם וַיּוֹשַׁע לוֹ וַיִּקּׂם נִקְמַת הַמֻּכֶּה בְּהַכּוֹתוֹ אֶת־הַמִּצְרִי׃

כה וַיַּחֲשׁׂב בִּלְבָבוֹ כִּי יָבִינוּ אֶחָיו אֲשֶׁר עַל־יָדוֹ יִתֵּן הָאֱלׂהִים לָהֶם תְּשׁוּעָה וְהֵם לׂא הֵבִינוּ׃

כו וַיְהִי בַּיּוֹם הַשֵּׁנִי וַיָּבֹא בְּתוֹכָם וְהֵם נִצִּים וַיְבַקֵּשׁ לַעֲשׂוֹת שָׁלוֹם בֵּינֵיהֶם לֵאמׂר אֲנָשִׁים אַחִים אַתֶּם וְלָמָּה תַכּוּ אִישׁ אֶת־אָחִיו׃

כז וְהַמַּכֶּה אֶת־רֵעֵהוּ הֲדָפוֹ לֵאמׂר מִי שָׂמְךָ לְאִישׁ שַׂר וְשׁׂפֵט עָלֵינוּ׃

כח הַלְהָרְגֵנִי אַתָּה אׂמֵר כַּאֲשֶׁר הָרַגְתָּ אֶתְמׂל אֶת־הַמִּצְרִי׃

כט וַיִּבְרַח משֶׁה עַל־הַדָּבָר הַזֶּה וַיְהִי־גֵר בְּאֶרֶץ מִדְיָן וַיּוֹלֶד שָׁם שְׁנֵי בָנִים׃

ל וּבִמְלׂאת אַרְבָּעִים שָׁנָה נִרְאָה אֵלָיו מַלְאָךְ בְּמִדְבַּר הַר סִינַי בְּלַבַּת־אֵשׁ מִתּוֹךְ הַסְּנֶה׃

לא וַיַּרְא משֶׁה וַיִּתְמַהּ עַל־הַמַּרְאֶה וּבְסוּרוֹ לִרְאוֹת וַיְהִי־קוֹל יְהוָֹה אֵלָיו׃

לב אָנׂכִי אֱלׂהֵי אֲבוֹתֶיךָ אֱלׂהֵי אַבְרָהָם אֱלׂהֵי יִצְחָק וֵאלׂהֵי יַעֲקׂב וַיֶּחֱרַד משֶׁה וַיִּירָא מֵהַבִּיט׃

לג וַיּׂאמֶר אֵלָיו יְהוָֹה שַׁל נְעָלֶיךָ מֵעַל רַגְלֶיךָ כִּי הַמָּקוֹם אֲשֶׁר אַתָּה עוֹמֵד עָלָיו אַדְמַת־קׂדֶשׁ הוּא׃

לד רָאׂה רָאִיתִי אֶת־עֳנִי עַמִּי אֲשֶׁר בְּמִצְרַיִם וְאֶת־נַאֲקָתָם שָׁמַעְתִּי וָאֵרֵד לְהַצִּילָם וְעַתָּה לְכָה וְאֶשְׁלָחֲךָ מִצְרָיְמָה׃

לה הוּא משֶׁה אֲשֶׁר כִּחֲשׁוּ־בוֹ לֵאמׂר מִי שָׂמְךָ לְשַׂר וְשׁׂפֵט אׂתוֹ שָׁלַח הָאֱלׂהִים לְשַׂר וְגׂאֵל בְּיַד הַמַּלְאָךְ הַנִּרְאֶה אֵלָיו בַּסְּנֶה׃

לו וְהוּא הוֹצִיאָם וַיַּעַשׂ אׂתוֹת וּמׂפְתִים בְּאֶרֶץ מִצְרַיִם וּבְיַם־סוּף וּבַמִדְבָּר אַרְבָּעִים שָׁנָה׃

לז הוּא משֶׁה אֲשֶׁר אָמַר אֶל־בְּנֵי יִשְׂרָאֵל נָבִיא מִקֶּרֶב אֲחֵיכֶם כָּמׂנִי יָקִים לָכֶם יְהוָֹה אֱלׂהֵיכֶם אֵלָיו תִּשְׁמָעוּן׃

לח הוּא אֲשֶׁר הָיָה בַקָּהָל בַּמִדְבָּר עִם־הַמַּלְאָךְ הַדּׂבֵר אֵלָיו בְּהַר סִינַי וְעִם־אֲבוֹתֵינוּ וַאֲשֶׁר קִבֵּל דְּבָרִים חַיִּים לָתֵת לָנוּ׃

לט הוּא אֲשֶׁר אֲבוֹתֵינוּ לׂא אָבוּ לִשְׁמׂעַ לוֹ וַיִּמְאֲסוּ אׂתוֹ וּלְבָבָם פָּנָה מִצְרָיְמָה׃

מ וַיּׂאמְרוּ אֶל־אַהֲרוֹן עֲשֵׂה־לָנוּ אֱלׂהִים אֲשֶׁר יֵלְכוּ לְפָנֵינוּ כִּי זֶה משֶׁה אֲשֶׁר הֶעֱלָנוּ מֵאֶרֶץ מִצְרַיִם לׂא יָדַעְנוּ מֶה־הָיָה לוֹ׃

מא וַיַּעֲשׂוֹוֹ עֵגֶל בַּיָּמִים הָהֵם וַיִּזְבְּחוּ זְבָחִים לָאֱלִיל וַיִּשְׂמְחוּ בְּמַעֲשֵׂה יְדֵיהֶם׃

מב וַיִּפֶן מֵהֶם הָאֱלׂהִים וַיִּתְּנֵם לַעֲבֹד אֶת־צְבָא הַשָּׁמָיִם כַּכָּתוּב בְּסֵפֶר הַנְּבִיאִים הַזְּבָחִים וּמִנְחָה הִגַּשְׁתֶּם־לִי בַמִּדְבָּר אַרְבָּעִים שָׁנָה בֵּית יִשְׂרָאֵל׃

מג וּנְשָׂאתֶם אֵת סֻכַּת מִלְכּׂם וְאֶת־כּוֹכַב אֱלׂהֵיכֶם רָמְפָן הַצְּלָמִים אֲשֶׁר עֲשִׂיתֶם לְהִשְׁתַּחֲוֹת לָהֶם וְהִגְלֵיתִי אֶתְכֶם מֵהָלְאָה לְבָבֶל׃

מד מִשְׁכַּן הָעֵדוּת הָיָה לַאֲבוֹתֵינוּ בַּמִּדְבָּר אֲשֶׁר עָשָׂה משֶׁה כַּתַּבְנִית אֲשֶׁר רָאָה כַּאֲשֶׁר צִוָּה אׂתוֹ הַמְדַבֵּר אֵלָיו׃

מה וַאֲבוֹתֵינוּ לְקָחֻהוּ וְגַם־הֱבִיאֻהוּ אִתָּם הֵם וִיהוֹשֻׁעַ בְּרִשְׁתָּם אֶת־אַרְצוֹת הַגּוֹיִם אֲשֶׁר גֵּרַשׁ אׂתָם אֱלׂהִים מִפְּנֵי אֲבוֹתֵינוּ עַד־יְמֵי דָוִד׃

מו וְהוּא מָצָא חֵן בְּעֵינֵי אֱלׂהִים וַיִּשְׁאַל לִמְצׂא מִשְׁכָּנוֹת לֵאלׂהֵי יַעֲקׂב׃

מז וּשְׁלׂמׂה בָּנָה־לוֹ בָיִת׃

מח אֲבָל הָעֶלְיוֹן לׂא יִשְׁכּׂן בְּהֵיכָלוֹת מַעֲשֵׂי יָדָיִם כַּאֲשֶׁר אָמַר הַנָּבִיא׃

מט הַשָּׁמַיִם כִּסְאִי וְהָאָרֶץ הֲדׂם רַגְלָי אֵי־זֶה בַיִת אֲשֶׁר תִּבְנוּ־לִי אָמַר יְהוָֹה וְאֵי־זֶה מָקוֹם מְנוּחָתִי׃

נ הֲלׂא אֶת־כָּל־אֵלֶּה יָדִי־עָשָׂתָה׃

נא קְשֵׁי עׂרֶף וְעַרְלֵי לֵב וְאָזְנָיִם מַמְרִים הֱיִיתֶם תָּמִיד בְּרוּחַ הַקּׂדֶשׁ כַּאֲבוֹתֵיכֶם גַּם־אַתֶּם׃

נב מִי מֵהַנְּבִיאִים אֲשֶׁר לׂא רְדָפוּהוּ אֲבוֹתֵיכֶם אַף־הֵמִיתוּ אֵת הַמְבַשְּׂרִים מִקֶּדֶם בִּיאַת הַצַּדִּיק אֲשֶׁר עַתָּה הֱיִיתֶם אַתֶּם מוֹסְרָיו וּמְרַצְּחָיו׃

נג אַתֶּם אֲשֶׁר קִבַּלְתֶּם אֶת־הַתּוֹרָה עַל־יְדֵי מַלְאֲכוֹת הַמַּלְאָכִים וְלׂא שְׁמַרְתֶּם אוֹתָהּ׃

נד וַיְהִי כְּשָׁמְעָם אֶת־אֵלֶּה וַיִּגָּע בָּהֶם עַד נָפֶשׁ וַיַּחַרְקוּ עָלָיו שִׁנֵּיהֶם׃

נה וְהוּא מָלֵא רוּחַ הַקּׂדֶשׁ וַיַּבֵּט הַשָּׁמָיְמָה וַיַּרְא אֶת־כְּבוֹד אֱלׂהִים וְאֶת־יֵשׁוּעַ נִצָּב לִימִין הָאֱלׂהִים׃

נו וַיּׂאמֶר הִנְנִי רׂאֶה אֶת־הַשָּׁמַיִם נִפְתָּחִים וְאֵת בֶּן־הָאָדָם נִצָּב לִימִין הָאֱלׂהִים׃

נז וַיִּזְעֲקוּ קוֹל גָּדוֹל וַיַּאַטְמוּ אֶת־אָזְנֵיהֶם וַיִּתְנַפְּלוּ עָלָיו כֻּלָּם יָחַד׃

נח וַיִּדְחָפֻהוּ חוּצָה לָעִיר וַיִּסְקְלוּ אׂתוֹ בָּאֲבָנִים וְהָעֵדִים פָּשְׁטוּ אֶת־בִּגְדֵיהֶם לְרַגְלֵי בָּחוּר אֶחָד וּשְׁמוֹ שָׁאוּל׃

נט וַיִּסְקְלוּ אֶת־אִסְטְפָנוֹס וְהוּא מְשַׁוֵּעַ וְאׂמֵר אֲדׂנִי יֵשׁוּעַ קַבֵּל אֶת־רוּחִי׃

ס וַיִּכְרַע עַל־בִּרְכָּיו וַיִּזְעַק קוֹל גָּדוֹל יְהוָֹה אַל־תִּשְׁמׂר לָהֶם אֶת־הַחֵטְא הַזֶּה וַיְהִי אַחֲרֵי דַבְּרוֹ כַּדָּבָר הַזֶּה וַיִּישָׁן׃