Acts 10

א וְאִישׁ הָיָה בְּקֵיסַרְיָה וּשְׁמוֹ קָרְנֵילִיּוֹס שַׂר־מֵאָה מִן־הַגְּדוּד הַנִּקְרָא הָאִיטַלְקִי׃

ב וְהוּא חָסִיד וִירֵא אֱלׂהִים עִם־כָּל־בְּנֵי בֵיתוֹ וְעׂשֵׂה צְדָקוֹת הַרְבֵּה לָעָם וּמִתְפַּלֵּל תָּמִיד לֵאלׂהִים׃

ג וַיְהִי הַיּוֹם כַּשָּׁעָה הַתְּשִׁיעִית לַיּוֹם וְהִנֵּה מַלְאַךְ אֱלׂהִים בָּא אֵלָיו בְּמַחֲזֶה וַיּׂאמֶר קָרְנֵילִיּוֹס׃

ד וַיַּבֵּט אֵלָיו וַיִּירָא וַיּׂאמֶר מַה־זֶּה אֲדׂנִי וַיּׂאמֶר אֵלָיו תְּפִלּוֹתֶיךָ וְצִדְקוֹתֶיךָ עָלוּ לְזִכָּרוֹן לִפְנֵי הָאֱלׂהִים׃

ה וְעַתָּה שְׁלַח־לְךָ אֲנָשִׁים אֶל־יָפוֹ וְהָבֵא אֵלֶיךָ אֶת־שִׁמְעוֹן הַמְכֻנֶּה פֶטְרוֹס׃

ו הוּא מִתְגּוֹרֵר עִם־בּוּרְסִי אֶחָד שִׁמְעוֹן שְׁמוֹ אֲשֶׁר בֵּיתוֹ עַל־יַד הַיָּם הוּא יׂאמַר לְךָ אֶת־אֲשֶׁר עָלֶיךָ לַעֲשׂוֹת׃

ז וַיֵּלֶךְ־לוֹ הַמַּלְאָךְ הַדּׂבֵר אֶל־קָרְנֵילִיּוֹס וַיִּקְרָא אֶל־שְׁנַיִם מֵעַבְדֵי בֵיתוֹ וְאֶל־אִישׁ מִלְחָמָה אֶחָד יְרֵא אֱלׂהִים מִן־הָעׂמְדִים תָּמִיד לְפָנָיו לְשָׁרֲתוֹ׃

ח וַיְסַפֵּר לָהֶם אֵת כָּל הַדְּבָרִים וַיִּשְׁלָחֵם אֶל־יָפוֹ׃

ט וַיְהִי מִמָּחֳרָת וְהֵמָּה הׂלְכִים בַּדֶּרֶךְ וּקְרֵבִים לָעִיר וַיַּעַל פֶּטְרוֹס עַל־הַגָּג לְהִתְפַּלֵּל כַּשָּׁעָה הַשִּׁשִּׁית׃

י וְהוּא רָעֵב וַיִּתְאָו לִטְעָם־לָחֶם וּבַהֲכִינָם לוֹ נָפְלָה עָלָיו תַּרְדֵּמָה׃

יא וַיַּרְא אֶת הַשָּׁמַיִם נִפְתָּחִים וְהִנֵּה־כְלִי יׂרֵד אֵלָיו כִּדְמוּת מִטְפַּחַת־בַּד גְּדוֹלָה וַיּוּרַד קָשׁוּר בְּאַרְבַּע כַּנְפוֹתָיו עַל־הָאָרֶץ׃

יב וּבְתוֹכוֹ מִכָּל־בֶּהֱמַת הָאָרֶץ וְחַיָּה וָרֶמֶשׂ וְעוֹף הַשָּׁמָיִם׃

יג וַיְהִי־קוֹל אֵלָיו לֵאמׂר קוּם פֶּטְרוֹס טְבַח וֶאֱכׂל׃

יד וַיּׂאמֶר פֶּטְרוֹס חָלִילָה לִּי אֲדׂנִי כִּי מֵעוֹלָם לׂא אָכַלְתִּי כָּל־פִּגּוּל וְטָמֵא׃

טו וַיְהִי־עוֹד קוֹל אֵלָיו פַּעַם שֵׁנִית לֵאמׂר אֶת־אֲשֶׁר טִהַר הָאֱלׂהִים אַתָּה אַל־תְּטַמְּאֶנּוּ׃

טז וְכֵן הָיָה שָׁלשׁ פְּעָמִים וְהַכְּלִי שָׁב וְהׂעֲלָה הַשָּׁמָיְמָה׃

יז וַיְהִי בְּהִתְפָּעֵם רוּחַ פֶּטְרוֹס עַל־הַמַּרְאֶה אֲשֶׁר רָאָה וְהִנֵּה הָאֲנָשִׁים הַשְּׁלוּחִים מֵאֵת קָרְנֵילִיּוֹס שָׁאֲלוּ לְבֵית שִׁמְעוֹן וַיַּעַמְדוּ עַל־הַפָּתַח׃

יח וַיִּקְרְאוּ וַיִּדְרְשׁוּ הֲיֵשׁ מִתְגּוֹרֵר שָׁם שִׁמְעוֹן הַמְכֻנֶּה פֶטְרוֹס׃

יט וּפֶטְרוֹס עוֹדֶנּוּ חשֵׁב עִם־לְבָבוֹ עַל־הַמַּרְאֶה וְהָרוּחַ אָמַר אֵלָיו הִנֵּה שְׁלשָׁה אֲנָשִׁים מְבַקְשִׁים אוֹתָךְ׃

כ לָכֵן קוּם רֵד וּלְכָה־נָּא אִתָּם וְאַל־תַּחְשׁׂב חִשְּׁבֹנוֹת רַבִּים כִּי אָנׂכִי שְׁלַחְתִּים׃

כא וַיֵּרֶד פֶּטְרוֹס אֶל־הָאֲנָשִׁים (הַנִּשְׁלָחִים אֵלָיו מֵאֵת קָרְנֵילִיּוֹס) וַיּׂאמַר אָנׂכִי הָאִישׁ אֲשֶׁר אַתֶּם מְבַקְשִׁים לָמָּה־זֶּה בָאתֶם הֵנָּה׃

כב וַיּׂאמְרוּ קָרְנֵילִיּוֹס שַׂר־מֵאָה אִישׁ צַדִּיק וִירֵא אֱלׂהִים וְלוֹ שֵׁם־טוֹב בְּכָל־עַם הַיְהוּדִים צֻוָּה עַל־פִּי מַלְאָךְ קָדוֹשׁ לִקְרׂא לְךָ אֶל־בֵּיתוֹ וְלִשְׁמׂעַ דְּבָרִים מִפִּיךָ׃

כג וַיִּקְרָא אׂתָם אֵלָיו וַיַּאַסְפֵם הַבָּיְתָה וַיְהִי מִמָּחֳרָת וַיֵּצֵא פֶטְרוֹס אִתָּם וּמִקְצָת הָאַחִים אֲשֶׁר בְּיָפוֹ הָלְכוּ עִמּוֹ׃

כד וּלְמָחֳרָתוֹ בָּאוּ אֶל־קֵיסַרְיָה וְקָרְנֵילִיּוֹס מְחַכֶּה לָהֶם וְעִמּוֹ בְּנֵי מִשְׁפַּחְתּוֹ וּקְרוֹבָיו וּמְיֻדָּעָיו הַנִּקְהָלִים אֵלָיו׃

כה וַיְהִי כְּבוֹא פֶטְרוֹס וַיֵּצֵא קָרְנֵילִיּוֹס לִקְרָאתוֹ וַיִּפּׂל לְרַגְלָיו וַיִּשְׁתָּחוּ׃

כו וַיָּקֶם אוֹתוֹ פֶטְרוֹס וַיּׂאמֶר קוּם כִּי גַּם־אֲנִי אֱנוֹשׁ אָנׂכִי׃

כז וַיְדַבֵּר אִתּוֹ וַיָּבֹא הַבָּיְתָה וַיִּמְצָא רַבִּים נֶאֱסָפִים שָׁמָּה׃

כח וַיּׂאמֶר אֲלֵיהֶם אַתֶּם יְדַעְתֶּם כִּי־אָסוּר הוּא לְאִישׁ יְהוּדִי לְהִלָּוֹת וְלִקְרׂב אֶל־נָכְרִי וְאׂתִי הוֹרָה אֱלׂהִים לְבִלְתִּי אֱמׂר חׂל אוֹ־טָמֵא עַל־כָּל־אָדָם׃

כט וּבַעֲבוּר זׂאת כַּאֲשֶׁר נִקְרֵאתִי לׂא נִמְנַעְתִּי מֵהֲלׂךְ וְעַתָּה אֶשְׁאָלְכֶם עַל־מַה־זֶּה קְרָאתֶם לִי׃

ל וַיּׂאמֶר קָרְנֵילִיּוֹס זֶה אַרְבָּעָה יָמִים הָיִיתִי צָם עַד־הַשָּׁעָה הַזּׂאת וּבַשָּׁעָה הַתְּשִׁיעִית הִתְפַּלַּלְתִּי בְתוֹךְ בֵּיתִי וְהִנֵּה־אִישׁ נִצָּב לְפָנַי בִּלְבוּשׁ זׂהַר׃

לא וַיּׂאמַר קָרְנֵילִיּוֹס נִשְׁמְעָה תְפִלָּתְךָ וְצִדְקוֹתֶיךָ הָיוּ לְזִכָּרוֹן לִפְנֵי הָאֱלׂהִים׃

לב וְעַתָּה שְׁלַח אֶל־יָפוֹ וּקְרָא אֵלֶיךָ אֶת־שִׁמְעוֹן הַמְכֻנֶּה פֶטְרוֹס מִתְגּוֹרֵר הוּא בְּבֵית שִׁמְעוֹן הַבּוּרְסִי עַל־הַיָּם (אֲשֶׁר בְּבוֹאוֹ יְדַבֶּר־לָךְ)׃

לג וָאֲמַהֵר וָאֶשְׁלַח אֵלֶיךָ וְאַתָּה הֵיטַבְתָּ לַעֲשׂוֹת אֲשֶׁר־בָּאתָ אֵלָי וְהִנְנוּ כֻּלָּנוּ פׂה לִפְנֵי הָאֱלׂהִים לִשְׁמׂעַ אֶת־כָּל־אֲשֶׁר צֻוֵּיתָ בַּיְהוָה׃

לד וַיִּפְתַּח פֶּטְרוֹס אֶת־פִּיו וַיּׂאמַר עַתָּה יָדַעְתִּי בֶאֱמֶת כִּי הָאֱלׂהִים אֵינֶנּוּ נׂשֵׂא פָנִים׃

לה כִּי אִם־בְּכָל־עַם וָעָם הַיָּרֵא אוֹתוֹ וְעׂשֶׂה צֶּדֶק רָצוּי הוּא לְפָנָיו׃

לו וַיִּשְׁלַח אֶת־דְּבָרוֹ לִבְנֵי יִשְׂרָאֵל וַיְבַשֵּׂר אֶת־הַשָּׁלוֹם עַל־יְדֵי יֵשׁוּעַ הַמָּשִׁיחַ וְהוּא אֲדוֹן הַכּׂל׃

לז אַתֶּם יְדַעְתֶּם אֶת־הַדָּבָר הַנַּעֲשֶׂה בְכָל־יְהוּדָה הָחֵל מִן־הַגָּלִיל אַחֲרֵי הַטְּבִילָה אֲשֶׁר־קָרָא אׂתָהּ יוֹחָנָן׃

לח אֵת אֲשֶׁר־מָשַׁח הָאֱלׂהִים אֶת־יֵשׁוּעַ הַנָּצְרִי בְּרוּחַ הַקּׂדֶשׁ וּבִגְבוּרָה וַיַּעֲבֹר בָּאָרֶץ עׂשֵׂה חֶסֶד וְרׂפֵא אֶת־כָּל־הַנִּכְבָּשִׁים תַּחַת יַד הַשָּׂטָן כִּי הָאֱלׂהִים הָיָה עִמּוֹ׃

לט וַאֲנַחְנוּ עֵדִים עַל־כָּל־אֲשֶׁר עָשָׂה בְּאֶרֶץ הַיְהוּדִים וּבִירוּשָׁלַיִם וַאֲשֶׁר הֱמִתֻהוּ בְּהוֹקִיעָם אׂתוֹ עַל־הָעֵץ׃

מ אוֹתוֹ הֵקִים הָאֱלׂהִים בַּיּוֹם הַשְּׁלִישִׁי וַיִּתְּנֵהוּ לְהֵרָאוֹת בְּגָלוּי׃

מא לׂא לְכָל־הָעָם כִּי אִם־לָנוּ הָעֵדִים אֲשֶׁר הָאֱלׂהִים בָּחַר בָּהֶם מֵרׂאשׁ אֲשֶׁר אָכַלְנוּ וְשָׁתִינוּ אִתּוֹ אַחֲרֵי קוּמוֹ מִן־הַמֵּתִים׃

מב וַיְצַו אׂתָנוּ לְהַשְׁמִיעַ לָעָם וּלְהָעִיד כִּי אׂתוֹ שָׂם הָאֱלׂהִים לְשׁוֹפֵט הַחַיִּים וְהַמֵּתִים׃

מג וְעָלָיו כָּל־הַנְּבִיאִים מְעִידִים כִּי יְקַבְּלוּ סְלִיחַת הַחֲטָאִים בִּשְׁמוֹ כָּל־הַמַּאֲמִינִים בּוֹ׃

מד וּפֶטְרוֹס עוֹדֶנּוּ מְדַבֵּר הַדְּבָרִים הָאֵלֶּה וְרוּחַ הַקּׂדֶשׁ צָלְחָה עַל כָּל־הַשּׁׂמְעִים אֶת־הַדָּבָר׃

מה וְהַמַּאֲמִינִים הַמּוּלִים אֲשֶׁר בָּאוּ אֶת־פֶּטְרוֹס תָּמְהוּ כִּי־מַתְּנַת רוּחַ הַקּׂדֶשׁ נִשְׁפְּכָה גַּם עַל־הַגּוֹיִם׃

מו כִּי שָׁמְעוּ אׂתָם מְמַלֲלִים בִּלְשׁׂנוֹת וּמְגַדְּלִים אֶת־הָאֱלׂהִים׃

מז וַיַּעַן פֶּטְרוֹס וַיּׂאמַר הֲיוּכַל אִישׁ לִמְנׂעַ אֶת־הַמַּיִם מִטְּבֹל אֶת־אֵלֶּה אֲשֶׁר קִבְּלוּ אֶת־רוּחַ הַקּׂדֶשׁ גַּם־הֵם כָּמׂנוּ׃

מח וַיְצַו בְּשֵׁם הָאָדוֹן לִטְבֹּל אׂתָם וַיְבַקְשׁוּ מִמֶּנּוּ לָשֶׁבֶת אִתָּם יָמִים אֲחָדִים׃