Revelation 3

א וְאֶל־מַלְאַךְ קְהַל סַרְדִּיס כְּתׂב כּׂה אָמַר אֲשֶׁר־לוֹ שֶׁבַע רוּחוֹת הָאֱלׂהִים וְשִׁבְעַת הַכּוֹכָבִים יָדַעְתִּי אֶת־מַעֲשֶׂיךָ כִּי־לְךָ שֵׁם כְּאִלּוּ חַי אַתָּה וְהִנְּךָ מֵת׃

ב שְׁקׂד וְחַזֵּק אֶת־הַשְּׁאֵרִית הַקְּרוֹבָה לָמוּת כִּי לׂא־מָצָאתִי מַעֲשֶׂיךָ שְׁלֵמִים לִפְנֵי אֱלׂהָי׃

ג זְכוֹר אֵת אֲשֶׁר־קִבַּלְתָּ וְשָׁמָעְתָּ וְשָׁמְרָה־זּׂאת וְשׁוּבָה וְאִם־לׂא תִשְׁקׂד הִנְנִי בָא עָלֶיךָ כַּגַּנָּב וְלׂא תֵדַע הַשָּׁעָה אֲשֶׁר אָבֹא עָלֶיךָ׃

ד יֶשׁ־לְךָ גַם־בְּסַרְדִּיס שֵׁמוֹת מְעַט אֲשֶׁר לׂא גֵאֲלוּ אֶת־מַלְבּוּשֵׁיהֶם וְיִתְהַלְּכוּ אִתִּי לְבֻשֵׁי לְבָנִים כִּי רְאוּיִם הֵם לָזׂאת׃

ה הַמְנַצֵּחַ יִלְבַּשׁ בְּגָדִים לְבָנִים וְלׂא אֶמְחֶה אֶת־שְׁמוֹ מִסֵּפֶר הַחַיִּים וְאוֹדֶה שְׁמוֹ לִפְנֵי אָבִי וְלִפְנֵי מַלְאָכָיו׃

ו מִי אֲשֶׁר־אׂזֶן לוֹ יִשְׁמַע אֵת אֲשֶׁר הָרוּחַ אׂמֵר לַקְּהִלּוֹת׃

ז וְאֶל־מַלְאַךְ קְהַל פִילָדֶלְפִיָּא כְּתׂב כּׂה אָמַר הַקָּדוֹשׁ הָאֲמִתִּי אֲשֶׁר בְּיָדוֹ מַפְתֵּחַ דָּוִד הַפּׂתֵחַ וְאֵין סׂגֵר וְסׂגֵר וְאֵין פּׂתֵחַ׃

ח יָדַעְתִּי אֶת־מַעֲשֶׂיךָ הִנֵּה נָתַתִּי לְפָנֶיךָ שַׁעַר פָּתוּחַ אֲשֶׁר לׂא־יוּכַל אִישׁ לְסָגְרוֹ כִּי כׂחַ־מְעַט לָךְ וַתִּשְׁמׂר אֶת־דְּבָרִי וְלׂא כִחַשְׁתָּ בִּשְׁמִי׃

ט הִנְנִי נׂתֵן אֲנָשִׁים מִכְּנֵסֶת הַשָּׂטָן אֲשֶׁר יׂאמְרוּ יְהוּדִים אֲנַחְנוּ וְאֵינָם כִּי־דׂבְרֵי שֶׁקֶר הֵמָּה הִנְנִי עׂשֶׂה אֲשֶׁר יָבֹאוּ לְהִשְׁתַּחֲוֹת לְרַגְלֶיךָ וְיָדְעוּ כִּי אֲנִי אֲהַבְתִּיךָ׃

י יַעַן שָׁמַרְתָּ דְּבַר סַבְלָנוּתִי אֶשְׁמָרְךָ גַם־אֲנִי מִשְּׁעַת הַנִּסָּיוֹן הָעֲתִידָה לָבוֹא עַל־תֵּבֵל כֻּלָּהּ לְנַסּוֹת אֶת־יׂשְׁבֵי הָאָרֶץ׃

יא הִנְנִי בָא מְהֵרָה הַחֲזֵק בַּאֲשֶׁר לָךְ לְמַעַן לׂא־יִקַּח אִישׁ אֶת־נִזְרֶךָ׃

יב הַמְנַצֵּחַ אֶתְּנֶנּוּ לְעַמּוּד בְּהֵיכַל אֱלׂהַי וְלׂא־יֵצֵא עוֹד הַחוּצָה וְכָתַבְתִּי עָלָיו אֶת־שֵׁם אֱלׂהַי וְאֶת־שֵׁם עִיר אֱלׂהַי יְרוּשָׁלַיִם הַחֲדָשָׁה הַיּׂרֶדֶת מִשָּׁמַיִם מֵעִם־אֱלׂהַי וְאֶת־שְׁמִי הֶחָדָשׁ׃

יג מִי אֲשֶׁר־אׂזֶן לוֹ יִשְׁמַע אֵת אֲשֶׁר הָרוּחַ אׂמֵר לַקְּהִלּוֹת׃

יד וְאֶל־מַלְאַךְ קְהַל לוּדְקְיָא כְּתׂב כּׂה אָמַר הָאָמֵן הָעֵד הַנֶּאֱמָן וְהָאֲמִתִּי רֵאשִׁית בְּרִיאַת הָאֱלׂהִים׃

טו יָדַעְתִּי אֶת־מַעֲשֶׂיךָ כִּי לׂא קַר אַתָּה וְלׂא חָם מִי־יִתֵּן וְהָיִיתָ קַר אוֹ־חָם׃

טז כִּי עַתָּה פּוֹשֵׁר אַתָּה וְלׂא קַר וְלׂא חָם עַל־כֵּן אֲקִיאֲךָ מִפִּי׃

יז כִּי אָמַרְתָּ אַךְ עָשַׁרְתִּי מָצָאתִי אוֹן לִי וְלׂא חָסַרְתִּי כּׂל וְלׂא יָדַעְתָּ כִּי־אֻמְלַל אַתָּה וְדַוָּי וְעָנִי וְעִוֵּר וְעֵרׂם׃

יח אִיעָצְךָ לִקְנוֹת מֵאִתִּי זָהָב צָרוּף בָּאֵשׁ לְמַעַן תַּעֲשִׁיר וּבְגָדִים לְבָנִים לְמַעַן תִּתְכַּסֶּה בָהֶם וְלׂא תֵרָאֶה בֹּשֶׁת עֶרְוָתְךָ וְקִלּוּרִית לָתֵת עַל־עֵינֶיךָ לְמַעַן תִּרְאֶה׃

יט אֲנִי אֶת־כּׂל אֲשֶׁר אֵהַב אוֹכִיחַ וַאֲיַסֵּר לָכֵן תִּשְׁקׂד וְתָשׁוּב׃

כ הִנְנִי עׂמֵד בַּפֶּתַח וְדׂפֵק וְהָיָה כִּי־יִשְׁמַע אִישׁ לְקוֹלִי וּפָתַח הַפֶּתַח אָבוֹא אֵלָיו וְסָעַדְתִּי עִמּוֹ וְהוּא עִמִּי׃

כא הַמְנַצֵּחַ אֶתְּנֶנּוּ לָשֶׁבֶת אִתִּי עַל־כִּסְאִי כַּאֲשֶׁר נִצַּחְתִּי גַם־אָנׂכִי וָאֵשֵׁב אֶת־אָבִי עַל־כִּסְאוֹ׃

כב מִי אֲשֶׁר־אׂזֶן לוֹ יִשְׁמַע אֵת אֲשֶׁר הָרוּחַ אׂמֵר לַקְּהִלּוֹת׃