Revelation 21

א וָאֵרֶא שָׁמַיִם חֲדָשִׁים וְאֶרֶץ חֲדָשָׁה כִּי הַשָּׁמַיִם הָרִאשׁׂנִים וְהָאָרֶץ הָרִאשׁוֹנָה עָבְרוּ וְהַיָּם אֵינֶנּוּ עוֹד׃

ב וָאֵרֶא וְהִנֵּה הָעִיר הַקְּדוֹשָׁה יְרוּשָׁלַיִם הַחֲדָשָׁה יׂרֶדֶת מֵאֵת הָאֱלׂהִים מִן־הַשָּׁמָיִם וְהִיא מְתֻקֶּנֶת כַּכַּלָּה הַמְקֻשֶּׁטֶת לְבַעְלָהּ׃

ג וָאֶשְׁמַע קוֹל גָּדוֹל מִן־הַכִּסֵּא לֵאמׂר הִנֵּה מִשְׁכַּן אֱלׂהִים עִם־בְּנֵי הָאָדָם וְשָׁכַן בְּתוֹכָם וְהֵמָּה יִהְיוּ־לוֹ לְעָם וְהוּא הָאֱלׂהִים יִהְיֶה אִתָּם (אֱלׂהֵיהֶם)׃

ד וּמָחָה אֱלׂהִים כָּל־דִּמְעָה מֵעֵינֵיהֶם וְהַמָּוֶת לׂא יִהְיֶה־עוֹד וְגַם־אֵבֶל וּזְעָקָה וּכְאֵב לׂא יִהְיֶה־עוֹד כִּי הָרִאשׁׂנוֹת עָבָרוּ׃

ה וַיּׂאמֶר הַיּׂשֵׁב עַל־הַכִּסֵּא הִנְנִי עׂשֶׂה הַכּׂל חָדָשׁ וַיּׂאמֶר אֵלַי כְּתׂב אֲשֶׁר הַדְּבָרִים הָאֵלֶּה אֲמִתִּים וְנֶאֱמָנִים הֵם׃

ו וַיּׂאמֶר אֵלַי הָיׂה נִהְיָתָה אֲנִי הָאָלֶף וְהַתָּו הָרׂאשׁ וְהַסּוֹף אֲנִי אֶתֵּן לַצָּמֵא מִמַּעְיַן מַיִם חַיִּים חִנָּם׃

ז הַמְנַצֵּחַ יִירַשׁ הַכּׂל וַאֲנִי אֶהְיֶה־לּוֹ לֵאלׂהִים וְהוּא יִהְיֶה־לִּי לְבֵן׃

ח אֲבָל רַכֵּי הַלֵּב וַאֲשֶׁר אֵינָם מַאֲמִינִים וְהַמְגׂאָלִים וְהַמְרַצְּחִים וְהַזּׂנִים וְהַמְכַשְּׁפִים וְעׂבְדֵי הָאֱלִילִים וְכָל־הַמְשַׁקְּרִים חֶלְקָם הָאֲגַם הַבֹּעֵר בְּאֵשׁ וְגָפְרִית אֲשֶׁר־הוּא הַמָּוֶת הַשֵּׁנִי׃

ט וַיָּבֹא אֵלַי אֶחָד מִשִּׁבְעַת הַמַּלְאָכִים הַנּׂשְׂאִים שֶׁבַע הַקְּעָרוֹת הַמְּלֵאוֹת שֶׁבַע הַמַּכּוֹת הָאַחֲרׂנוֹת וַיְדַבֵּר אֵלַי לֵאמׂר בֹּא וְאַרְאֲךָ אֶת־הַכַּלָּה אֵשֶׁת הַשֶׂה׃

י וַיִּקָּחֵנִי בָרוּחַ עַל־הַר גָּדוֹל וְגָבֹהַּ וַיַּרְאֵנִי הָעִיר הַקְּדוֹשָׁה יְרוּשָׁלַיִם הַגְּדוֹלָה יׂרֶדֶת מִן־הַשָּׁמַיִם מֵאֵת הָאֱלׂהִים׃

יא וְעָלֶיהָ כְּבוֹד אֱלׂהִים וְאוֹר נָגְהָהּ כְּאֶבֶן יְקָרָה מְאׂד כְּאֶבֶן יָשְׁפֶה הַמַּבְהֶקֶת כְּעֵין הַקָּרַח׃

יב וְלָהּ חוֹמָה גְּדוֹלָה וּגְבֹהָה וּשְׁנֵים עָשָׂר שְׁעָרִים לָהּ וְעַל־הַשְּׁעָרִים שְׁנֵים עָשָׂר מַלְאָכִים וְשֵׁמוֹת כְּתוּבִים עֲלֵיהֶם וְהֵם שְׁמוֹת שְׁנֵים־עָשָׂר שִׁבְטֵי בְּנֵי יִשְׂרָאֵל׃

יג שְׁעָרִים שְׁלׂשָׁה מִמִּזְרָח שְׁעָרִים שְׁלׂשָׁה מִצָּפוֹן שְׁעָרִים שְׁלׂשָׁה מִנֶּגֶב וּשְׁעָרִים שְׁלׂשָׁה מִמַּעֲרָב׃

יד וּלְחוֹמַת הָעִיר שְׁנֵים עָשָׂר מוֹסָדוֹת וַעֲלֵיהֶם שְׁנֵים עָשָׂר שֵׁמוֹת לִשְׁנֵים עָשָׂר שְׁלִיחֵי הַשֶׂה׃

טו וּבְיַד הַמְדַבֵּר אֵלַי קְנֵה זָהָב לָמׂד אֶת־הָעִיר וְאֶת־שְׁעָרֶיהָ וְאֵת חוֹמָתָהּ׃

טז וּמוֹשַׁב הָעִיר מְרֻבָּע וְאָרְכָּהּ כְּרָחְבָּהּ וַיָּמָד אֶת־הָעִיר בִּקְנֵה הַמִּדָּה שְׁנֵים עָשָׂר אֶלֶף רִיס אָרְכָּהּ וְרָחְבָּהּ וְקוֹמָתָהּ מִדָּה אַחַת לָהֶם׃

יז וַיָּמָד אֶת־חוֹמָתָהּ מֵאָה וְאַרְבָּעִים וְאַרְבַּע אַמּוֹת בְּמִדַּת אִישׁ אֲשֶׁר־הִיא מִדַּת הַמַּלְאָךְ׃

יח וּבִנְיַן חוֹמַת הָעִיר אֶבֶן יָשְׁפֶה וְהָעִיר זָהָב מוּפָז דּוֹמֶה לִזְכוֹכִית זַכָּה׃

יט וּמוֹסְדוֹת חוֹמַת הָעִיר מֻרְבָּצוֹת בְּכָל־אַבְנֵי חֵפֶץ הַמּוֹסָד הָרִאשׁוֹן יָשְׁפֶה הַשֵּׁנִי סַפִּיר הַשְּׁלִישִׁי שְׁבוֹ הָרְבִיעִי בָּרָקֶת׃

כ הַחֲמִישִׁי יַהֲלׂם הַשִּׁשִּׁי אׂדֶם הַשְּׁבִיעִי תַרְשִׁישׁ הַשְּׁמִינִי שׁׂהַם הַתְּשִׁיעִי פִטְדָה הָעֲשִׂירִי נׂפֶךְ אַחַד הֶעָשָׂר לֶשֶׁם שְׁנֵים הֶעָשָׂר אַחְלָמָה׃

כא וּשְׁנֵים עָשָׂר הַשְּׁעָרִים שְׁתֵּים עֶשְׂרֵה מַרְגָּלִיּוֹת כָּל־שַׁעַר וָשַׁעַר מַרְגָּלִית אֶחָת וּרְחוֹב הָעִיר זָהָב מוּפָז כִּזְכוֹכִית בְּהִירָה׃

כב וְהֵיכָל לׂא־רָאִיתִי בָהּ כִּי יְהוָֹה אֱלׂהִים צְבָאוֹת הוּא וְהַשֶׂה הֵיכָלָהּ׃

כג וְהָעִיר אֵינֶנָּה צְרִיכָה לְאוֹר הַשֶּׁמֶשׁ וּלְנׂגַהּ הַיָּרֵחַ כִּי־כְבוֹד אֱלׂהִים הֵאִיר לָהּ וְנֵרָהּ הוּא הַשֶׂה׃

כד וְהַגּוֹיִם יֵלְכוּ לְאוֹרָהּ וּמַלְכֵי־אֶרֶץ מְבִיאִים כְּבוֹדָם וְתִפְאַרְתָּם אֵלֶיהָ׃

כה וּשְׁעָרֶיהָ יוֹמָם לׂא־יִסָּגֵרוּ כִּי לַיְלָה לׂא־יִהְיֶה שָּׁם׃

כו וְהֵבִיאוּ בָהּ כְּבוֹד הַגּוֹיִם וְתִפְאַרְתָּם׃

כז וְלׂא־יָבוֹא בָהּ כָּל־טָמֵא וְעׂשֵׂה תוֹעֵבָה וָשָׁקֶר כִּי אִם־הַכְּתוּבִים בְּסֵפֶר הַחַיִּים שֶׁל־הַשֶׂה׃