Matthew 8

א וַיֵּרֶד מִן־הָהָר וַיֵּלֶךְ אַחֲרָיו הֲמוֹן עַם רָב׃

ב וְהִנֵּה אִישׁ מְצׂרָע בָּא וַיִּשְׁתַּחוּ־לוֹ וַיּׂאמַר אֲדׂנִי אִם־תִּרְצֶה תּוּכַל לְטַהֲרֵנִי׃

ג וַיִּשְׁלַח יֵשׁוּעַ אֶת־יָדוֹ וַיִּגַּע־בּוֹ וַיּׂאמֶר חָפֵץ אָנׂכִי טְהָר וּבְרֶגַע נִרְפְּאָה צָרַעְתּוֹ׃

ד וַיּׂאמֶר אֵלָיו יֵשׁוּעַ רְאֵה אַל־תְּסַפֵּר לְאִישׁ וְלֵךְ הֵרָאֵה אֶל־הַכּׂהֵן וְהִקְרַבְתָּ אֶת־הַקָּרְבָּן אֲשֶׁר צִוָּה משֶׁה לְעֵדוּת לָהֶם׃

ה וַיְהִי כְּבֹאוֹ אֶל־כְּפַר־נַחוּם וַיִּגַּשׁ אֵלָיו שַׂר־מֵאָה אֶחָד וַיִּתְחַנֶּן־לוֹ לֵאמׂר׃

ו אֲדׂנִי הִנֵּה נַעֲרִי נָפַל לְמִשְׁכָּב בְּבֵיתִי וְהוּא נְכֵה אֵבָרִים וּמְעֻנֶּה עַד־מְאׂד׃

ז וַיּׂאמֶר יֵשׁוּעַ אֵלָיו אָבֹא וּרְפָאתִיו׃

ח וַיַּעַן שַׂר־הַמֵּאָה וַיּׂאמַר אֲדׂנִי נְקַלּתִי מֵאֲשֶׁר תָּבֹא בְּצֵל קוֹרָתִי רַק דַבֶּר־נָא דָּבָר וְנִרְפָּא נַעֲרִי׃

ט כִּי אָנׂכִי אִישׁ אֲשֶׁר תַּחַת מֶמְשָׁלָה וְגַם־יֵשׁ תַּחַת יָדִי אַנְשֵׁי צָבָא וְאָמַרְתִּי לָזֶה לֵךְ וְהָלַךְ וְלָזֶה בּוֹא וּבָא וּלְעַבְדִּי עֲשֵׂה־זׂאת וְעָשָׂה׃

י וַיִּשְׁמַע יֵשׁוּעַ וַיִּתְמַהּ וַיּׂאמֶר אֶל־הַהׂלְכִים אַחֲרָיו אָמֵן אׂמֵר אֲנִי לָכֶם גַּם־בְּיִשְׂרָאֵל לׂא־מָצָאתִי אֱמוּנָה רַבָּה כָּזׂאת׃

יא וַאֲנִי אׂמֵר לָכֶם רַבִּים יָבֹאוּ מִמִּזְרָח וּמִמַּעֲרָב וְיָסֵבּוּ עִם־אַבְרָהָם וְיִצְחָק וְיַעֲקׂב בְּמַלְכוּת הַשָׁמָיִם׃

יב אֲבָל בְּנֵי הַמַּלְכוּת הֵמָּה יְגׂרֲשׂוּ אֶל־הַחשֶׁךְ הַחִיצוֹן שָׁם תִּהְיֶה הַיְלָלָה וַחֲרוֹק הַשִׁנָּיִם׃

יג וַיּׂאמֶר יֵשׁוּעַ אֶל־שַׂר־הַמֵּאָה לֵךְ וְכֶאֱמוּנָתְךָ כֵּן יִהְיֶה־לָּךְ וַיֵּרָפֵא נַעֲרוֹ בַּשָׁעָה הַהִיא׃

יד וַיָּבֹא יֵשׁוּעַ בֵּיתָה פֶטְרוֹס וַיַּרְא אֶת־חֲמוֹתוֹ נׂפֶלֶת לְמִשְׁכָּב וְחוֹלַת קַדָּחַת׃

טו וַיִּגַּע בְּיָדָהּ וַתִּרֶף מִמֶּנָּה הַקַּדָּחַת וְתָּקָם וַתְּשָׁרֲתֵם׃

טז וַיְהִי לְעֵת עֶרֶב וַיָּבִיאוּ אֵלָיו רַבִּים אֲחוּזֵי שֵׁדִים וַיְגָרֶשׁ אֵת־הָרוּחוֹת בִּדְבַר פִּיו וַיְרַפֵּא אֵת כָּל־הַחוֹלִים׃

יז לְמַלּאת אֵת אֲשֶׁר דִּבֶּר יְשַׁעְיָהוּ הַנָּבִיא לֵאמׂר חֳלָיֵנוּ הוּא נָשָׂא וּמַכְאׂבֵינוּ סְבָלָם׃

יח וַיְהִי כִּרְאוֹת יֵשׁוּעַ הֲמוֹן עַם רַב סְבִיבֹתָיו וַיְצַו לַעֲבֹר מִשָׁם אֶל־עֵבֶר הַיָּם׃

יט וַיִּגַּשׁ אֵלָיו אַחַד הַסּוֹפְרִים וַיּׂאמֶר אֵלָיו רַבִּי אֵלְכָה אַחֲרֶיךָ אֶל כָּל־אֲשֶׁר תֵּלֵךְ׃

כ וַיּׂאמֶר אֵלָיו יֵשׁוּעַ לַשׂוּעָלִים יֵשׁ־חוֹרִים וּלְעוֹף הַשָׁמַיִם קִנִּים וּבֶן־הָאָדָם אֵין לוֹ מָקוֹם לְהַנִּיחַ אֶת־רׂאשׁוֹ׃

כא וְאִישׁ אַחֵר מִן־הַתַּלְמִידִים אָמַר אֵלָיו אֲדׂנִי הַנִּיחָה־לִּי וְאֵלֵךְ בָּרִאשׁוֹנָה לִקְבֹּר אֶת־אָבִי׃

כב וַיּׂאמֶר אֵלָיו יֵשׁוּעַ לֵךְ אַחֲרָי וְהַנַּח לַמֵּתִים לִקְבֹּר אֶת־מֵתֵיהֶם׃

כג וַיֵּרֶד אֶל־הָאֳנִיָּה וַיֵּרְדוּ אִתּוֹ תַּלְמִידָיו׃

כד וְהִנֵּה סַעַר גָּדוֹל הָיָה בַיָּם עַד־אֲשֶׁר כִּסּוּ הַגַּלִּים אֶת־הָאֳנִיָּה וְהוּא יָשֵׁן׃

כה וַיִּגְּשׁוּ אֵלָיו תַּלְמִידָיו וַיָּעִירוּ אוֹתוֹ לֵאמׂר הוֹשִׁיעֵנוּ אֲדׂנֵינוּ אָבָדְנוּ׃

כו וַיּׂאמֶר אֲלֵיהֶם קְטַנֵּי אֱמוּנָה מַה חֲרֵדִים אַתֶּם וַיָּקָם וַיִּגְעַר בָּרוּחוֹת וּבַיָּם וַתְּהִי דְּמָמָה רַבָּה׃

כז וַיִּתְמְהוּ הָאֲנָשִׁים וַיּׂאמְרוּ מִי אֵפוֹא הוּא אֲשֶׁר גַּם־הָרוּחוֹת וְהַיָּם אֵלָיו יִשְׁמָעוּן׃

כח וַיְהִי כְּבֹאוֹ אֶל־עֵבֶר הַיָּם אֶל־אֶרֶץ הַגַּדְרִיִּם וַיִּפְגְּשׁוּהוּ שְׁנֵי אֲנָשִׁים אֲחוּזֵי שֵׁדִים יׂצְאִים מִבָּתֵּי הַקְּבָרוֹת וְהֵמָּה רַגְזָנִים מְאׂד עַד אֲשֶׁר לׂא־יָכׂל אִישׁ לַעֲבֹר בַּדֶּרֶךְ הַהוּא׃

כט וְהִנֵּה הֵם צׂעֲקִים לֵאמׂר מָה לָּנוּ וָלָךְ יֵשׁוּעַ בֶּן הָאֱלׂהִים הֲבָאתָ הֲלׂם לְעַנּוֹתֵנוּ בְּלׂא עֵת׃

ל וְשָׁם עֵדֶר חֲזִירִים רַבִּים רׂעִים הָרְחֵק מֵהֶם׃

לא וַיִּתְחַנֲנוּ אֵלָיו הַשֵׁדִים לֵאמׂר אִם תְּגָרֲשֵׁנוּ תְּנָה לָּנוּ לָבוֹא בְּעֵדֶר הַחֲזִירִים׃

לב וַיּׂאמֶר אֲלֵיהֶם לֵכוּ וַיֵּצְאוּ וַיָּבֹאוּ בְּעֵדֶר הַחֲזִירִים וְהִנֵּה הִשְׂתָּעֵר כָּל־עֵדֶר הַחֲזִירִים מִן־הַמּוֹרָד אֶל־הַיָּם וַיָּמוּתוּ בַּמָּיִם׃

לג וַיָּנוּסוּ הָרׂעִים וַיָּבֹאוּ הָעִירָה וַיַּגִּידוּ אֶת־הַכּׂל וְאֵת אֲשֶׁר נַעֲשָׂה לַאֲחוּזֵי הַשֵׁדִים׃

לד וְהִנֵּה כָּל־הָעִיר יָצְאָה לִקְרַאת יֵשׁוּעַ וְכִרְאוֹתָם אׂתוֹ וַיְבַקְשׁוּ מִמֶּנּוּ לַעֲבֹר מִגְּבוּלָם׃