Titus 2

א וְאַתָּה דַּבֵּר אֶת־הַנָּאֶה לַלֶּקַח הַבָּרִיא׃

ב הַזְּקֵנִים יִהְיוּ משְׁלִים בְּרוּחָם וּמְכֻבָּדִים וּצְנוּעִים וּבְרִיאִים בָּאֱמוּנָה וּבָאַהֲבָה וּבַסַּבְלָנוּת׃

ג וְכֵן הַזְּקֵנוֹת תְּהִי דַרְכָּן כַּאֲשֶׁר נָאֲוָה לַקּׂדֶשׁ לׂא תִהְיֶינָה מוֹצִיאוֹת דִּבָּה רָעָה וְלׂא נְתֻנוֹת לִסְבוֹא־יַיִן כִּי אִם־מְלַמְּדוֹת טוֹב׃

ד וּמְיַשְּׁרוֹת אֶת־הַצְּעִירוֹת לֶאֱהׂב אֶת־בַּעֲלֵיהֶן וְלֶאֱהׂב אֶת־בְּנֵיהֶן׃

ה וְלִהְיוֹת צְנוּעוֹת וּטְהׂרוֹת צוֹפִיּוֹת הֲלִיכוֹת בֵּיתָן וְטׂבוֹת וְנִכְנָעוֹת לִפְנֵי בַעֲלֵיהֶן לְמַעַן אֲשֶׁר לׂא־יְחֻלַּל דְּבַר הָאֱלׂהִים׃

ו כָּכָה תַּזְהִיר גַּם אֶת־הַבַּחוּרִים שֶׁיִּהְיוּ צְנוּעִים׃

ז וּבְכָל־דָּבָר הֱיֵה אַתָּה לְמוֹפֵת בְּמַעֲשִׂים טוֹבִים בְּהוֹרָאָה צְרוּפָה וְנֶהְדָּרָה׃

ח וּבְדָבָר בָּרִיא שֶׁאֵין־בּוֹ מוּם לְמַעַן יֵבוֹשׁ הַמִּתְקוֹמֵם וְלׂא יִמְצָא לְדַבֵּר עֲלֵיכֶם רָע׃

ט הָעֲבָדִים יִכָּנְעוּ לַאֲדׂנֵיהֶם וְיִתְרַצּוּ לָהֶם לְכָל־דָּבָר וְלׂא יַמְרוּ אֶת־דִּבְרֵיהֶם׃

י וְלׂא־יִמְעֲלוּ מַעַל כִּי אִם־יַרְאוּ כָּל־אֱמוּנָה טוֹבָה לְמַעַן יְפָאֲרוּ בַכּׂל אֶת־לֶקַח אֱלׂהִים מוֹשִׁיעֵנוּ׃

יא כִּי הוֹפִיעַ חֶסֶד אֱלׂהִים לְהוֹשִׁיעַ אֶת־כָּל־בְּנֵי הָאָדָם׃

יב וּלְהַדְרִיךְ אׂתָנוּ לְמַעַן נְתַעֵב הָרֶשַׁע וְתַאֲוֹת הָעוֹלָם וְנִתְהַלֵּךְ בָּעוֹלָם הַזֶּה בִּצְנִיעוּת וּבְצֶדֶק וּבַחֲסִידוּת׃

יג וּנְחַכֶּה לַתִּקְוָה הַמְאַשֶּׁרֶת וּלְהוֹפָעַת כְּבוֹד אֱלׂהֵינוּ הַגָּדוֹל וּמוֹשִׁיעֵנוּ יֵשׁוּעַ הַמָּשִׁיחַ׃

יד אֲשֶׁר־נָתַן אֶת־נַפְשׁוֹ בַּעֲדֵנוּ לִפְדּוֹת אׂתָנוּ מִכָּל־עָוֶל וּלְטַהֵר לוֹ עַם סְגֻלָּה הַזָּרִיז בְּמַעֲשִׂים טוֹבִים׃

טו אֵלֶּה תְדַבֵּר וְתַזְהִיר וְתוֹכִיחַ בְּחָזְקָה וְאִישׁ אַל־יָבוּז לָךְ׃