ዘካርያስ 6

1 ከም ብሓድሽ ኣዒንተይ ኣልዐልኩ፣ እንሆ ድማ፣ ኣርባዕተ ሰረገላ ኻብ መንጎ ኽልተ ኸረን ኪወጻ ኸለዋ ርኤኹ፣ እቲ ኣኽራንውን ኣኽራን ኣስራዚ ነበረ።

2 ኣብታ ቐዳመይቲ ሰረገላ ሓመራት ኣፍራስ፣ ኣብታ ኻልኣይቲ ሰረገላ ኸኣ መጋላት ኣፍራስ ነበሩ።

3 ኣብታ ሳልሰይቲ ሰረገላ ኣምባላያት ኣፍራስ፣ ኣብታ ራብዐይቲ ሰረገላ ድማ ጫጎታት ብርቱዓት ኣፍራስ ነበሩ።

4 ኣነ ኸኣ ነቲ ዚዛረበኒ ዝነበረ መልኣኽ፣ ጐይታየ እዚኣቶምሲ እንታይ እዮም∶ ኢለ መለስኩሉ።

5 እቲ መልኣኽ ከኣ ከምዚ ኢሉ መለሰለይ፣ እዚኣቶም እቶም ኣብ ቅድሚ ዅላ ምድሪ ቘይሞም ዚወጹ ኣርባዕተ ንፋሳት ሰማይ እዮም፣

6 እታ መጋላት ኣፍራስ ዘለውዋ ናብ ሃገር ሰሜን ኣቢላ ትወጽእ፣ እቶም ኣምበሌታት ኣፍራስ ከኣ ደድሕሪኦም ይወጹ፣ እቶም ጫጎታት ኣፍራስ ድማ ናብ ደቡብ ኣቢሎም ይወጹ።

7 እቶም ሓመራት ከኣ ወጹ፣ ንምድሪ ኺመላለስዋ ድማ ደለዩ። ንሱውን፣ ኪዱ ንምድሪ ተመላለስዋ፣ በለ። ንሳቶም ከኣ ንምድሪ ተመላለስዋ።

8 ሽዑ ንሱ ጸውዓኒ እሞ፣ እንሆ፣ እቶም ናብ ሃገር ሰሜን ኣቢሎም ዝወጹ፣ ኣብ ሃገር ሰሜን መንፈሰይ ኣህድኡ፣ ኢሉ ተዛረበኒ።

9 ከምዚ ዚብል ቃል እግዚኣብሄር ከኣ መጸኒ፣

10 ካብቶም ምሩኻት ካብ ሔልዳይ፣ ካብ ጦብያ፣ ካብ የዳዕያ፣ ናብታ ንሳቶም ካብ ባቢሎን መጺኦም ዝአተውዋ ቤት ዮስያስ ወዲ ጸፎንያስ ሎሚ እቶ፣

11 ብሩርን ወርቅን ውሰድ እሞ ኣኽሊላት ስራሕ፣ ኣብ ርእሲ እቲ ሊቀ ኻህናት እያሱ ወዲ የሆጻዳቅ ድማ ድፍኣሉ።

12 እግዚኣብሄር ጐይታ ሰራዊት ከምዚ ይብል ኣሎ፣ ኢልካውን ተዛረቦ፣ እቲ ጨንፈር ዝስሙ ሰብኣይ እንሆ፣ ንሱ ኻብ ቦታኡ ኺጭንፍር፣ መቕደስ እግዚኣብሄር ድማ ኪሀንጽ እዩ።

13 ንሱ መቕደስ እግዚኣብሄር ኪሀንጽ፣ ክብሪ ኸኣ ኪጸውር፣ ኣብ ዝፋኑ ድማ ኪቕመጥን ኪገዝእን እዩ፣ ኣብ ዝፋኑ ኻህን ኪኸውን፣ ኣብ መንጎ ኽልቲኦምውን ምኽሪ ሰላም ኪኸውን እዩ።

14 እቲ ኣኽሊላት ከኣ ንሄላምን ንጦብያን ንየዳዕያን ንሄን ወዲ ጸፎንያስን ኣብ መቕደስ እግዚኣብሄር ንመዘከርታ ኪዀኖም እዩ።

15 እቶም ኣብ ርሑቕ ዘለዉ ኺመጹ፣ ኣብ መቕደስ እግዚኣብሄር ከኣ ኪሰርሑ እዮም፣ ንስኻትኩም ድማ እግዚኣብሄር ጐይታ ሰራዊት ናባኻትኩም ከም ዝለኣኸኒ ኽትፈልጡ ኢኹም። ነቲ ደሃይ እግዚኣብሄር ኣምላኽኩም ተጠንቂቕኩም እንተ ሰማዕኩም፣ እዚ ኪኸውን እዩ።