ዘጸአት 10

1-2 እግዚኣብሄር ድማ ንሙሴ፡ እዚ ትእምርትታተይ እዚ ምእንቲ ኣብ ማእከሎም ክገብር፡ እቲ ኣብ ግብጻውያን ዝዐየኽዎ ነገርን፡ እቲ ኣብ ማእከሎም ዝገበርክዎ ትእምርትታተይን ኣብ ኣእዛን ወድኻን ወዲ ወድኻን ምእንቲ ኽትነግሮ፡ ኣነ እግዚኣብሄር ምዃነይ ከኣ ክትፈልጡስ፡ ኣነ ንልቡን ንልቢ ገላዉኡን ኣትሪረ እየ እሞ፡ ናብ ፍርኦን እቶ።

3 ሙሴን ኣሮንን ድማ ናብ ፈርኦን ኣትዮም በልዎ፡ እግዚኣብሄር፡ ኣምላኽ እብራውያን፡ ከምዚ ይብል፡ ክሳዕ መኣዝ ኢኻ ኣብ ቅድመይ ከይትተሐት እትኣቢ፧ ንህዝበይ ኬገልግለኒ ሕደጎም።

4 ንስኻ ንህዝበይ ምሕዳጉ እንተ ኣቤኻ ግና፡ እንሆ፡ ጽባሕ ናብ ምድርኻ ኣንበጣ ኸምጽእ እየ።

5 ንምድሪ ኸኣ ኪኸድና እዩ፡ ገጽ ምድሪ እኳ ኺርእዩ ኣይክእሉን። ነቲ ኻብ በረድ ድሒኑ ዝተረፈልኩም ትርፊ ድማ ኪበልዖ እዩ። ነተን ኣብ መሮር ዚዐብያልኩም ኵለን ኣእዋም ከኣ ኺበልዔን እዩ።

6 ኣባይትኻን ኣባይቲ ዅሎም ገላዉኻን ኣባይቲ ዅሎም ግብጻውያንን ኪመልእ እዩ። ከምኡ ዝበለ ኣቦታትካን ኣቦታት ኣቦታትካን ኣብ ምድሪ ኻብ እተፈጥሩላ መዓልቲ ጀሚሮም ክሳዕ እዛ መዓልቲ እዚኣ ኣይረኣዩን። ተመሊሱ ኸኣ ካብ ፈርኦን ወጸ።

7 ንፈርኦን ድማ ገላዉኡ፡ ክሳዕ መኣዝከ እዚ ሰብኣይዚ መፈንጠራ ኪዀነና እዩ፧ ነዞም ሰባት፡ ንእግዚኣብሄር ኣምላኾም ኬገልግሉ፡ ሕደጎም። ግብጺ ኸም ዝጠፍኤትዶ ገና ኣይፈለጥካን ኢኻ፧ በልዎ።

8 ሽዑ ንሙሴን ንኣሮንን ናብ ፈርኦን መለስዎም። ንሱ ድማ፡ ኪዱ ንእግዚኣብሄር ኣምላኽኩም ኣገልግሉ። እቶም ዚኸዱ ግና መነመን እዩም፧ በሎም።

9 ሙሴ ድማ፡ በዓል እግዚኣብሄር ከነብዕል ኢና እሞ፡ ምስ ናእሽቱናን ምስ ዓበይትናን ክንከይድ ኢና፡ ምስ ኣወዳትናን ምስ ኣዋልድናን ምስ ኣባጊዕናን ምስ ኣሓናን ክንከይድ ኢና፡ በለ።

10 ንሱ ድማ፡ ከምቲ ኣነ ምስ ደቅኹም ዝሐደግኩኹም፡ ከምኡ ኸኣ እግዚኣብሄር ምሳኻትኩም ይኹን። ርኣዩ፡ ክፍኣት ኣብ ቅድሜኹም ኣሎ።

11 ከምኡ ኣይኰነን። ሰብኡት ደኣ ኺዱ ንእግዚኣብሄር ኣገልግሉ። እቲ ዝደሌኹምዎ ኸኣ ንሱ እዩ፡ በሎም። ካብ ቅድሚ ፈርኦን ድማ ሰጐግዎም።

12 እግዚኣብሄር ድማ ንሙሴ፡ ምእንቲ ኣንበጣ ናብ ምድሪ ግብጺ ኺድይብ እሞ፡ ንዅሉ ብቝሊ ምድርን ነቲ በረድ ዝሐደጎ ዅሉን ኪበልዕሲ ኣእዳውካ ናብ ልዕሊ ምድሪ ግብጺ ዘርግሕ፡ በሎ።

13 ሙሴ ኸኣ፡ በትሩ ናብ ልዕሊ ምድሪ ግብጺ ዘርግሔ፡ እግዚኣብሄር ድማ ኣብታ ምድሪ ብዅላ እታ መዓልቲ እቲኣን ብኵላ ለይትን ንፋስ ምብራቕ ኣምጽኤ። ምስ ወግሔ ድማ፡ እቲ ንፋስ ምብራቕ ኣንበጣ ኣምጽኤ።

14 እቲ ኣንበጣ ኸኣ ናብ ልዕሊ ዅላ ምድሪ ግብጺ ደየበ፡ ኣብ ኵላ ሃገር ግብጺ ድማ ኣዝዩ ብዙሕ ረገፈ። ክንዳኡ ዝምብዛሑ ኣንበጣ ቕድሚኡ ኣይነበረን፡ ብድሕሪኡ ኸኣ ከምኡ ዝበለ ከቶ ኣይከውንን።

15 ምድሪ ኽሳዕ እትጽልምት ንገጽ ኵላ ምድሪ ኸደና። ንዅሉ ብቝሊ ምድርን ነቲ በረድ ዝሐደጎ ዅሉ ፍረ ኦምን ድማ በልዖ። ኣብ ኵላ ምድሪ ግብጺ ገለ ለምለም ኣብ ኦም ወይ ኣብ ብቝሊ ግራት ኣይተረፈን።

16 ሽዑ ፈርኦን ንሙሴን ንኣሮንን ቀልጢፉ ጸዊዑ፡ ንእግዚኣብሄር ኣምላኽኩምን ንኣኻትኩምን በደልኩ።

17 ሕጂ ግና እዛ ጊዜ እዚኣ ጥራይ፡ በጃኻ ሕደገለይ። እዚ ሞትዚ ጥራይ ኬርሕቐለይ ድማ ንእግዚኣብሄር ኣምላኽኩም ለምኑ፡ በሎም።

18 ካብ ፈርኦን ወጺኡ ኸኣ፡ ንእግዚኣብሄር ለመነ።

19 እግዚኣብሄር ድማ ህቦብላ ንፋስ ምዕራብ መለሰ። ነቲ ኣንበጣ ገፊፉ ኸኣ ናብ ባሕሪ ኤርትራ ደርበዮ። ኣብ ኵላ ምድሪ ግብጺ ሓደ ኣንበጣ እኳ ኣይተረፈን።

20 እግዚኣብሄር ግና ንልቢ ፈርኦን ኣትረሮ፡ እሞ ንደቂ እስራኤል ኣይሐደጎምን።

21 እግዚኣብሄር ድማ ንሙሴ፡ ኢድካ ናብ ሰማይ ዘርግሕ፡ ኣብ ምድሪ ግብጺ ኸኣ ጸልማት፡ ዚርምሰስ ጸልማት እኳ ደኣ ይኹን፡ በሎ።

22 ሙሴ ድማ ኢዱ ናብ ሰማይ ዘርግሑ፡ ኣብ ኵላ ምድሪ ግብጺ ከኣ ስለስተ መዓልቲ ግብ ዝበለ ጸልማት ኰነ።

23 ሰለስተ መዓልቲ ሓደ ነቲ ኻልኣዩ ኣይረኣየን፡ ካብ ምቕማጡ ኸኣ ሓደ እኳ ኣይተንስኤን። ንዅሎም ደቂ እስራኤል ግና ኣብ እተቐመጥዎ ብርሃን ነበረ።

24 ፈርኦን ድማ ንሙሴ ጸዊዑ፡ ኪድ ንእግዚኣብሄር ኣገልግል፡ ኣባጊዕኩምን ኣሓኹምን ጥራይ ይትረፋ። ቈልዑኹም ድማ ምሳኻትኩም ይኺድ፡ በሎ።

25 ሙሴ ኸኣ፡ ንስኻ ድማ ንእግዚኣብሄር ኣምላኽና እንስውኦ መስዋእቲ ሕሩድን ዚሓርር መስዋእትን ኣብ ኢድና ኽትህበና ኢኻ።

26 እቲ ንእግዚኣብሄር ኣምላኽና እነገልግለሉ ኻብኤን ክንወስድ ኢና እሞ፡ ስለዚ ማልና ድማ፡ ሓንቲ ሸዀና ኸይተረፈት፡ ምሳና ኪኸዳ እየን። ንሕና ድማ ኣብኡ ኽሳዕ እንበጽሕ፡ ንእግዚኣብሄር ብምንታይ ከም እነገልግሎ ኣይንፈልጥን ኢና፡ በለ።

27 እግዚኣብሄር ግና ልቢ ፈርኦን ኣትረረ፡ እሞ ኺሐድጎም ኣይፈተወን።

28 ፈርኦን ድማ ካባይ ኪዱ፡ ገጸይ ምስ እትርኢ መዓልቲ ኽትመውት ኢኻ እሞ፡ መሊስካ ገጸይ ከይትርኢ ንርእስኻ ተጠንቀቕ፡ በሎ።

29 ሙሴ ኸኣ፡ ከም ዝበልካዮ ይኹን፡ ደጊም መሊሰ ገጽካ ኣይርእን፡ በለ።